داوایەکی خێرا لە هاووڵاتیانی بەغدا دەکرێت: پەنجەرەکانتان دابخەن و ماسک بەکاربهێنن

ئاڤا نیوز

ڕوانگەی عێراقی سەوز سێ هۆکاری سەرەکیی بۆ بەردەوامبوونی پیسبوونی هەوای بەغدای پایتەختی عێراق دەستنیشان دەکات، کە یەکێکە لە پیسترین شارەکانی جیهان لەڕووی هەواوە.

 

ڕاگەیێنراوی فەرمی: ڕوانگەی عێراقی سەوز لە ڕاگەیێنراوێکدا هۆکارە سەرەکییەکانی پشت پیسبوونی هەوای بەغدای پایتەختی عێراق بە بەردەوامی دەستنیشان دەکات، هاوکات هۆشداری دەدات.

 

هۆکارە زانراوەکان: ڕوانگەکە ئاماژە بەوە دەکات کە کارگە نایاسایییەکانی خشت و قیرتاوکردن، کە مۆڵەتی ژینگەییان نییە و سووتەمەنیی کوالێتیی نزم بەکاردەهێنن، بەردەوامن لە کارکردن. ئەمەش سەرەڕای ئەوەی پێشتر چەندین جار داوای لێپرسینەوە و داخستنیان کراوە، بەڵام لایەنە پەیوەندیدارەکان گوێ بەم کێشەیە نادەن.

- سووتاندنی زبڵ و خاشاک بە شێوەیەکی بەردەوام و بێ وەستان، یەکێکی دیکەیە لە هۆکارەکان. نەبوونی گرنگیپێدان لەلایەن لایەنە حکومییەکانەوە وای کردووە ئەم کارە لەم دواییانەدا زیاتر بێت و پیسبوونی هەوا پەرە بستێنێت.

- ڕوانگەکە ڕوونی دەکاتەوە کە بارودۆخی کەشوهەوای ئێستا لە بەغدا، وای کردووە پیسکەرەکان لە هەوادا بمێننەوە و بڵاوببنەوە. بەپێی پێوەرەکانی "IQ AIR"، هەوای بەغدا ئێستا لە ڕیزبەندیی یەکەمی پیسترین شارەکانی جیهاندایە، هەرچەندە ئەم ڕیزبەندییە بەردەوام لە گۆڕانکاریدایە.

مەترسییە پێشبینكراوەكان: ڕوانگەی عێراقی سەوز هۆشداری دەدات کە ئەگەر دۆخەکە بەم شێوەیە بمێنێتەوە و چارەسەر نەکرێت، پیسبوونەکە لە ڕۆژانی داهاتوودا خراپتر دەبێت. بەتایبەتی، لایەنە پەیوەندیدارەکان لەبری چارەسەرکردنی کێشەی کارگە پیشەسازییەکان، داوا لە هاووڵاتیان دەکەن پەنجەرەکانیان دابخەن و ماسک بەکاربهێنن.