ئاسایشی نیشتیمانیی عێراق تۆڕێکی بازرگانیکردن بە ماددەی هۆشبەر دەستگیردەکات

ئاڤا نیوز 

 

دەزگای ئاسایشی نیشتیمانیی عێراق دەستگیرکردنی تۆڕێکی نێودەوڵەتی لە پارێزگای بابل ڕادەگەیێنێت کە بازرگانی ماددەی هۆشبەر بوونە. 

 

چیرۆکی سەرەکی: ڕۆژی هەینی 05-04-2024، سێ بازرگان کە یەکێکیان بیانییە، لەو کاتەی ماددەی هۆشبەریان دەگواستەوە، لە پارێزگای بابل دەستگیرکران و لەلایەن دادگەوە سزای لەسێدارەدانیان بۆ دەرکرا. 

 

ڕاگەیێنراوی فەرمی: دەزگای ئاسایشی نیشتیمانی لە ڕاگەیێنراوێکدا دەڵێت: "لە چوارچێوەی زنجیرە ئۆپەراسیۆنە جۆرییەکانیان دژی تۆڕەکانی بازرگانیکردن بە ماددە هۆشبەرەکان و بە پشتبەستن بە زانیاریی وردی ئەمنی، بەڕێوەبەرایەتیی ئاسایشی پارێزگای بابل توانیان تۆڕێک دەستگیر بکەن لەوکاتەی ماددەی هۆشبەریان بردووەتە ناو شارەکە".

 

زانیاریی زیاتر: تۆڕەکە لە سێ کەس پێکهاتوون، یەکێکیان بیانی بووە، پاشان ڕەوانەی لایەنی دادی کراون و بەپێی ماددەی (27) لە یاسای بەرەنگاربوونەوەی ماددە هۆشبەرەکان و کارتێکەرە عەقڵییەکان ژمارە (50)ـی ساڵی 2017، سزای لەسێدارەدانیان بۆ دەرکراوە.

 

باکگراوند: هەفتەی ڕابردوو دەزگای ئاسایشی نیشتمانی عێراق دەستگیرکردنی دوو کەسی دیکەی لەلایەن هێزەکانیانەوە ڕاگەیاند، لە خاڵێکی پشکنین بە بڕێک ماددەی کریستاڵ کە لەناو دەنکە گوێزدا شاردرابووەوە، دەستگیر کرابوون.