لە عەربەت حەوت کەس بە تۆمەتی ڕاوکردنی کۆترەشینە دەستگیر دەکرێن

ئاڤا نیوز

بەڕێوەبەرایەتی پۆلیسی دارستان و ژینگەی سلێمانی ڕایگەیاند، لە عەربەت حەوت کەس بە تۆمەتی ڕاوکردنی کۆترەشینە دەستگیر کراون.

چیرۆکی سەرەکی: ڕۆژی 26-10-2025، چەند کەسێک 13 کۆترەشینەیان لە گوندی ڕازیانەی سنووری عەربەت ڕاو کردووە، دوای ئەوەی مەفرەزەکانی پۆلیسی دارستان و ژینگە بەمەیان زانیووە، ڕاوچیەکان هەڵهاتوون.

لێدوانی فەرمی: عەقید هێمن ئەمین، وتەبێژی پۆلیسی دارستان و ژینگەی سلێمانی بە ئاڤا میدیای ڕاگەیاند: حەوت کەس لە گوندی ڕازیانە بە تۆمەتی ڕاوکردنی 13 کۆترە شینە دەستگیر کراون، بە بڕیاری دادوەر تاوەکو ڕۆژی 3-11-2025، ڕادەگیرێن.

لەلایەکی دیکەوە: وتەبێژی پۆلیسی دارستان و ژینگە دەڵێت: ئەو کەسانەی دەستگیرکراون بەگوێرەی ماددەی 42ـی ژینگە مامەڵەیان لەگەڵ دەکرێت، ئەم کەسانە خوویان بە ڕاوکردنی باڵندەی بچووک وەکو کۆترەشینە گرتووە، خەڵکێکی زۆریش گازەندەیان لێ دەکەن.

زانیاریی زیاتر: سزای کوشتنی هەر باڵندەیەکی بچووک لە نێوان 25 هەزار تا 50 هەزار دینارە.

ئەوەی پێویستە بیزانیت: ئەگەر لە دادگاییکردن ساغ ببێتەوە ئەم ڕاوچیانە پێشینەی ڕاویان هەیە، ئەوا سزاكەیان بۆ دەکرێت بە دوو هێندە و سزای بەندکردنیشیان بەسەردا دەدرێت، بەندکردنەکانیش لە مانگێک تا سێ ساڵ دەبێت.

ئەمەش بزانە: ئەو 13 کۆترەی ڕاوکراون، گۆشتەکەیان تاوەکو یەکلایکردنەوەی کەیسەکە دەهێڵدرێتەوە، دواتر دەخرێتە ژێر خۆڵ و لەناودەبرێت.