پزیشکیان داوای دروستکردنی دراوێکی هاوبەشی ناوچەیی دەکات

ئاڤا نیوز

 

مەسعود پزشکیان، سەرۆککۆماری ئێران دەڵێت، بە ئامانجی پتەوکردنی بازرگانی و ڕووبەڕووبوونەوەی ئەو گەمارۆ نێودەوڵەتییانەی ئابووریی وڵاتەکەی پەکخستووە پێویستە دراوێکی هاوبەشی ناوچەیی دروست بکرێت.

 

لێدوانی فەرمی؛ مەسعوود پزیشکیان لەمیانی کۆبوونەوەی لەگەڵ وەزیری ناوخۆی تاجیکستان لە تاران ڕایگەیاند "دەتوانرێت دراوێکی هاوبەش لە ناوچەکەدا دروست بکرێت بە مەبەستی برەودان بە گەشەی ئابووری."

 

پزشکیان گوتیشی، بەهۆی ئەو پەیوەندییە ئایینی و کولتووریانەی کە وڵاتانی ناوچەکە پێکەوە دەبەستێتەوە، دەتوانرێت زەمینەیەکی لەبار بۆ تێپەڕاندنی ئاستەنگەکان بڕەخسێنرێت بۆ برەو دان بە گەشەی ئابووری؛ باشتروایە دراوێکی هاوچەرخ لە ناوچەکەدا دروست بکرێت.

 

زانیاریی زیاتر: ئەم پێشنیازە لەکاتێکدایە ئێران بەدەست گەمارۆ نێودەوڵەتییەکانەوە دەناڵێنێت، ئەم سزایانە بوونەتە بەربەستی سەرەکی لەبەردەم ئاڵوگۆڕی دارایی و بازرگانیی ئێران لەگەڵ وڵاتانی جیهاندا و کاریگەریی ڕاستەوخۆیان لەسەر بەهای ڕیاڵی ئێرانی هەبووە.

 

باکگراوند: ڕۆژی یەکشەممە، 5-10-2025، پەرلەمانی ئێران دەنگی لەسەر پرۆژە یاسایەک بۆ لابردنی چوار سفری دراوەکەی دا، دواتر بە کۆی دەنگ ئەو پڕۆژە یاسایە پەسەند کرا.