عامری لە خانەقینەوە: ئەوەی دەنگ بکڕێت نابێتە نوێنەری گەل

ئاڤا نیوز

ئەمینداری ڕێکخراوی بەدر سەردانی قەزای خانەقینی لە چوارچێوەی ناوچە کوردستانییەکانی دەرەوەی ئیدارەی هەرێمی کوردستان کرد و ڕایگەیاند، هەر کەس و لایەنێک دەنگی دەنگدەران بکڕێت ناتوانێت ببێتە نوێنەری گەلی عێراق.

وێنە گەورەکە: کۆتایی مانگی ڕابردووش ئەمینداری ڕێكخراوی بەدر لە پارێزگای دیالە بەشداری کۆبوونەوەیەکی هەڵبژاردنی حیزبەکەی کرد و ئەوەی خستەڕوو، "کڕینی دەنگ و ئەوەی لەبارەیەوە گوێمان لێی دەبێت دیاردەیەکی زۆر شەرمەزارییە، لەوانەش کارتی دەنگدان نەفرەتی خوای لێبێت بەهاکەی گەیشتووەتە 250 بۆ 300 هەزار دینار، ئەوەش عەیبەیە".

لێدوانی فەرمی: هادی عامری، ئەمینداری ڕێکخراوی بەدر لە چوارچێوەی بەسەرکردنەوەی قەزاکانی پارێزگای دیالە، دوێنێ چوارشەممە سەردانی قەزای خانەقینی کرد کە یەکێکە لە ناوچە کوردستانییەکانی دەرەوەی ئیدارەی هەرێمی کوردستان و ئاماژەی بەوەشکرد، ئەم هەڵبژاردنە بۆ عێراق "گرنگ، چارەنووساز و یەکلاکەرەوەیە"، بۆیە بۆ عێراق ئارام و خۆشگوزەران پێویستە خەڵک چالاکانە بەشداری هەڵبژاردن بکات.

عامری جارێکی دیکە ڕەخنەی لە کڕینی کارتی دەنگدان گرت و وتی، هەر کەس و لایەنێک لە هەڵبژاردنە پەرلەمانییەکەی داهاتوو، دەنگی دەنگدەران بکڕێت ناتوانێت ببێتە نوێنەری گەلی عێراق و تایبەتمەندی نوێنەرایەتی خەڵک وەرناگرێت.