دوای بەدواداچوونی ئاڤا محەممەد قوربانی ئازاد كرا

ئاڤا نیوز

دوای نزیكەی 20 ڕۆژ لە دەستگیركردنی لەلایەن هێزە ئەمنییەكانی یەكێتییەوە، دوای ئەوەی ئاڤا بەدواداچوونی بۆ بابەتەكە كرد و دەنگی كەسوكارەكەی گەیاند، محەممەد قوربانی نووسەر و چالاكوان ئازاد كرا. 

چیرۆكی سەرەكی: نزیكەی 20 ڕۆژ پێش ئێستا، لەلایەن هێزە ئەمنییەكانی یەكێتییەوە لە شارۆچكەی چەمچەماڵ محەممەد قوربانی كە نووسەرێكی كوردە و برازای نووسەر عارف قوربانییە دەستگیر كرا، لەو ماوەیەدا بێسەروشوێن بوو، بەپێی گوتەی كەسوكارەكەیشی هۆكاری دەستگیركردنەكەی تەنیا ڕەخنەیەكی ئاسایی بووە لە فەیسبووك كە نووسەرەكە سەبارەت بە  قوباد تاڵەبانی، ئەندامی مەكتەبی سیاسیی یەكێتییەوە بڵاوی كردووەتەوە.

زانیاریی پەیامنێر: چۆمان مەحموود، پەیامنێری ئاڤا لە سلێمانی ڕایگەیاند، محەممەد قوربانی ئازاد كراوە.

لێدوانی فەرمی: ڕەئوف قوربانی، باوکی محمەد قوربانی بە ئاڤای راگەیاند: ئەمشەو كوڕەكەم دوای زیاتر لە 17 رۆژ مانەوەی بە هۆی گوشارەكانی  ئاڤا میدیاوە ئازاد کرا، سوپاسی تەواوی ستافی ئاڤا میدیا دەکەم كە لەو ماوەیەدا لە هەوڵی بەردەوامدا بوون بۆ ئازادكردنی محەممەدی كوڕم، سوپاسی تایبەتیش بۆ هەوراز گوڵی ئەستێرەی ئاڤا كە چەند جارێك بابەتەكەی وروژاند.

گوتیشی: كوڕەكەمان بێ تاوان دەستگیر كرابوو.

ئەوەی پێویستە بیزانیت: بەپێی گوتەی كەسوكارەكەی هۆكاری دەستگیركردنی محەممەد ئەوە بووە كە لە لاپەڕەی خۆی لە فەیسبووك ڕەخنەیەكی لە قوباد تاڵەبانی، ئەندامی مەكتەبی سیاسیی یەكێتی گرتووە و نووسیویەتی "كاك قوباد، نوێنەرەكانت هیچ خزمەتێكی شاری چەمچەماڵ ناكەن” هەروەها ڕەخنەشی لە ئاسایشی دەڤەرەكە گرتووە بەوەی دەستێوەردان لە كاری دادگادا دەكەن.