حەشدی شەعبی: بۆ وەڵامدانەوەی ئیسرائیل چاوەڕێی فەرمانی خامنەیین

ئاڤا نیوز

سەرۆکی ئەرکانی دەستەی حەشدی شەعبی کە دامەزراوەیەکی سەربازی عێراقییە دەڵێت "بۆ وەڵامدانەوەی هێرشەکەی ئیسرائیل چاوەڕێی فەرمانی خامنەیین".

بۆچی گرنگە: حەشدی شەعبی بە دامەزراوەیەکی سەربازی سەر بە سیستەمی بەرگریی عێراق دادەنرێت، بەپێی یاسا دەبێت هەر بڕیار و فەرمان و جوڵەیەک لە سەرۆکوەزیرانی عێراق کە فەرماندەی گشتیی هێزە چەکدارەکانە وەربگرن.

لێدوانی فەرمی: عەبدولعەزیز محەممەداوی ناوسراو بە "ئەبو فەدەک"، کە سەرۆک ئەرکانی دەستەی حەشدی شەعبی عێراقییە و لە تاران بەشداری لە ڕێپێوانی ڕۆژی قودسدا کرد ڕایگەیاند: "حەشدی شەعبی لایەنێکی سەرەکییە لە جەنگی غەززە، ئێمە چاوەڕێی فەرمانی عەلی خامنەیی، ڕابەری باڵای شۆڕشی ئیسلامی ئێرانین، لەبارەی چۆنیەتی وەڵامدانەوەی بۆردوومانی ئیسرائیل بۆ سەر کونسوڵخانەی ئێران لە دیمەشق".

ئەوەی پێویستە بیزانیت: ڕۆژی 01-04-2024، کونسوڵخانەی ئێران لە دیمەشقی پایتەختی سووریا کرایە ئامانج، دوای هێرشەکەش سوپای پاسداران ڕایگەیاند: حەوت کەس لە فەرماندەی باڵا و ڕاوێژکارانی سەربازیی لە هێرشەکەدا کوژراون.