ئیسرائیل ئامادەکاری بۆ کردنەوەی بەرەیەکی نوێ لە عێراق دەکات

ئاڤا نیوز

ئیسرائیل لە ڕێگەی سوپا و دەزگای هەواڵگریی "موساد"ـەوە ئامادەکاری بۆ کردنەوەی بەرەیەکی نوێ لە عێراق دەکات، بە بیانووی دروستبوونی "هەڕەشە"ـی نوێ لەسەر ئیسرائیل کە ئێران پشتیوانییان دەکات.

بڵاوکراوەی فەرمی: ماڵپەڕی "والا"ـی عیبری ئاشکرای دەکات کە سوپای ئیسرائیل و موساد خۆیان بۆ هەڕەشە گەشەسەندووەکان لە عێراقەوە ئامادە دەکەن. سەرچاوەکانی سوپای ئیسرائیل ڕایانگەیاندووە کە ئێران سەرمایەگوزارییەکی بەرچاو لە میلیشیاکانی سەر بە خۆی و ژێرخانی تیرۆریستی لە عێراقدا کردووە، بە ئامانجی ئەوەی لە ڕێگەی ئاسمان و وشکانییەوە هێرش بکەنە سەر ئیسرائیل. ئەمەشیان بەستەوە بە سەردانەکەی ئەم دواییەی ئیسماعیل قائانی، فەرماندەی فەیلەقی قودس بۆ عێراق.

مەترسییە پێشبینیکراوەکان: ڕاپۆرتەکە دوو سیناریۆی ئیسرائیلی بۆ شێوازی هەڕەشەکە دەخاتە ڕوو:

یەکەم؛ هەڵدانی مووشەک و درۆن لە عێراقەوە، هاوشێوەی هێرشەکانی حووسییەکان.

دووەم؛ مانۆڕێکی وشکانی کە لە عێراقەوە دەستپێبکات و بەرەو سووریا و سنوورەکانی ئیسرائیل - ئوردن بڕوات. سوپای ئیسرائیل پێشتر مەشقی لەسەر ئەم سیناریۆیە کردووە.

پێدراوە ڕاستییەکان: هێزی ئاسمانیی ئیسرائیل هێرشی کردووەتە سەر ناوەندە لۆجستییەکانی ئێران لە نزیک سنووری عێراق، بە بیانووی بەکارهێنانیان لەلایەن ئەو گرووپە عێراقییانەی لەلایەن ئێرانەوە پشتیوانی دەکرێن.

قووڵتر: پێگە عیبرییەکە ئاماژە بە حەشدی شەعبی دەکات، بەتایبەتی کەتائیبی حیزبوڵڵا، کە خاوەنی کاریگەری و چەکی زۆرن و بەرپرسیارن لە قاچاخچێتی چەک و پێشتر هێرشیان کردووەتە سەر هێزەکانی ئەمریکا.

ئەوەی لەبارەیەوە دەگوترێت: ڕاپۆرتەکە دووپاتی دەکاتەوە کە "نامەی ڕوون و هەڕەشەی ڕاستەوخۆ لە ئیسرائیلەوە بۆ حکومەتی عێراق گوازراوەتەوە، بە نێوەندگیری ئەمریکی".