ڕوانگەیەکی ژینگەیی هۆشداریی دەدات و ڕەخنە لە حکومەتی عێراق دەگرێت

ئاڤا نیوز

ڕوانگەیەکی ژینگەیی عێراق هۆشداریی دەدات، ئەگەر بارانبارین دوابکەوێت ڕێژەی ئاوی گلدراو دەگاتە تەنیا 4%، هاوکات حکومەت تۆمەتبار دەکات بەوەی ئەم پرسەی فەرامۆشکردووە.

ڕاگەیێنراوی فەرمی: ڕوانگەی عێراقی سەوز لە ڕاگەیێنراوێکی تووندا دەربارەی ئاو ڕەخنە لە حکومەت دەگرێت و ڕایگەیاندووە، حکومەتی ئێستا بەتەواوەتی پرسی ئاوی لە بەرژەوەندی پرس و ململانێی سیاسی و ئابووریدا پشتگوێ خستووە، ئەمەش وایکردووە قەیرانەکە لە ئێستادا تووندتر ببێتەوە، بەجۆرێک وشکەساڵی کاریگەری نەک تەنیا لەسەر پارێزگاکانی باشوور، بەڵکو دەستیکردووە بە درێژبوونەوەی بۆ ناوچەکانی ڕۆژئاوا و باکووری بەغدا و شوێنی دیکە.

ڕوانگەکە دووپاتی کردەوە، "بارانبارین بە ڕێژەی جیاواز ڕەنگە پرسی بەرزبوونەوەی ئاستی ئاوی ڕووبارەکانی دیجلە و فورات و گۆم و بەنداوەکان چارەسەر نەکات، چونکە عێراق پێویستی بە بارانبارین هەیە بۆ ماوەی سێ مانگ بەڕێژەی بەرزی بەردەوام، بۆ ئەوەی بەشی وەرزی هاوینی داهاتوو بۆ کشتوکاڵ و بەکارهێنان بکات.

مەترسییە پێشبینیکراوەکان: عێراق سەوز هۆشداریی دەدات کە پرسی ئاو بە "خراپترین بارودۆخی" خۆیدا تێدەپەڕێت و ڕووبەڕووی تووندترین قەیران بووەتەوە لە ماوەی 90 ساڵی ڕابردوودا، ڕوانگەکە دەڵێت: "ئەگەر بارانبارین دوابکەوێت ڕەنگە لە ماوەی چەند مانگی داهاتوودا ئاوی گلدراو کەمببێتەوە بۆ کەمتر لە 4%  لە بەغدا و پارێزگاکان."

لێدوانی فەرمی: خالید شیمال، وتەبێژی وەزارەتی سەرچاوەکانی ئاو ڕایگەیاندووە، عێراق داوای کردووە تورکیا لە ماوەی 50 ڕۆژی داهاتوودا یەک ملیار مەتر سێجا ئاو بەربداتەوە، بەشێوەیەک 500 ملیۆن مەتر سێجا بۆ ڕووباری دیجلە و 500 ملیۆن مەتر سێجا بۆ ڕووباری فورات.