سەفین دزەیی: بەهۆی دابەشکردنی دوو مووچە جموجوڵێکی باش لە بازاڕ دروستبووە

ئاڤا نیوز

دوای ڕێککەوتنی نێوان سەرۆکوەزیران بارزانی و سوودانی لەبارەی چارەسەرکردنی کێشەی مووچە، بڕیار درا پێش جەژنی ڕەمەزان مووچەی تەواوی مووچەخۆرانی هەرێمی کوردستان دابەش بکرێت، بەرپرسی فەرمانگەی پەیوەندییەکانی دەرەوە لەمبارەیەوە دەڵێت "جموجوڵێکی باش کەوتووەتە بازاڕەوە".

 

لێدوانی فەرمی: سەفین دزەیی، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان بۆ ئاڤا نیوز ڕایگەیاند: پێشتر ڕێککەوتن هەبووە، بەڵام کێشە لە جێبەجێکردنی ڕێککەوتنەکە هەبوو، ئێستا کەشوهەوایەکی گونجاو بۆ چارەسەرکردنی کێشەکانی نێوان هەولێر و بەغدا دروستبووە".

 

لەلایەکی دیکەوە: حکومەتی هەرێمی کوردستان لە ماوەی هەفتەیەکدا بڕیاری دابەشکردنی دوو مووچەی ڕاگەیاند، سەفین دزەیی لەمبارەیەوە ئاماژەی بەوە دا کە "بەهۆیەوە جمجوڵێکی باش لە بازاڕ دروستبووە".

 

گۆشەیەکی دیکە: سەبارەت بە دەستپێکردنەوەی هەناردەی نەوتی هەرێمی کوردستان سەفین دزەیی گوتی: عێراق لە ڕاگرتنی هەناردەی نەوتی هەرێمی کوردستان، 10 تاوەکو 11 ملیار دۆلار زەرەری کردووە، ئێستا "گفتوگۆی باش" لەمبارەیەوە کراوە.