مامۆستایانی خوێندنی کوردی لە کەرکووک لەڕێگەی 'هەژماری من'ەوە مووچەكانیان وەردەگرن

ئاڤا نیوز

سەرپەرشتیاری خوێندنی کوردی لە کەرکووک ڕایگەیاند، هەزاران کارتی بانکی مامۆستایانی خوێندنی کوردی  لەسەر 'هەژماری من' تەواو بووە و لەمەودوا مووچەكانیان لەڕێگەی ئەی تی ئێمەكانەوە وەردەگرن.

لێدوانی فەرمی: کامەران عەلی، سەرپەرشتیاری خوێندنی کوردی لە کەرکووک بە ئاڤا میدیای ڕاگەیاند: سێ هەزار مامۆستای سنووری پارێزگای کەرکووک مووچەی مانگی هەشتیان لە ڕێگەی هەژماری منەوە وەرگرت، ئێستا کارتی بانکی سێ هەزار مامۆستای دیکەش تەواو بوونە و گەڕاونەتەوە.

لەلایەکی دیکەوە: سەرپەرەشتیاری خوێندنی کوردی لە کەرکووک وتی: ئەو سێ هەزار مامۆستایەی کارتە بانکییەکانیان لە هەژماری من گەڕاوەتەوە، ئێمە ڕۆژانە ناوی 300 مامۆستایان بڵاودەکەینەوە تا بچن لە بانکی چەمچەماڵ کارتەکانیان وەربگرنەوە.

- ئێستا مامەڵەی دوو هەزار مامۆستای خوێندنی کوردیش لە لای تیمی هەژماری منە و کارکردن بۆ دەرکردنی کارتی بانکی بۆیان بەردەوامە و مانگی داهاتوو تەواو دەکرێن.

ئەوەی پێویستە بیزانیت: هەشت هەزار مامۆستای خوێندنی کوردی لە سنووری پارێزگای کەرکووک هەن كە قوتابخانەكانی  دووزخورماتوو، داقوق، دبز، پردێ و ناوەندی کەرکووک دەگرێتەوە.

ئەمەش بزانە: هەر مامۆستایەک بۆ وەرگرتنی کارتی بانکییەکەی لە بانکی چەمچەماڵ دەبێت ئەم پێداویستیانەی پێبێت، 'ناسنامەی باری شارستانی یان کارتی نیشتمانی، ئەو ژمارە مۆبایلەی کە هەژمارە بانکییەکەی لەسەر تۆمارکراوە.