زیاتر لە 35 هەزار قوتابی لە بڕیاری سەرۆکوەزیران بارزانی بۆ داشکاندنی کرێی خوێندن سوودمەند دەبن

ئاڤا نیوز

 

وەزارەتی خوێندنی باڵا و توێژینەوەی زانستی، بڕیارێكی دیكەی سەرۆكوەزیران بارزانی جێبەجێكرد کە داشکاندنی 20%ـی كرێی خوێندنە و زیاتر لە 35 هەزار قوتابی لێی سوودمەند دەبن.

 

وێنە گەورەکە: سەرۆکوەزیران بارزانی ڕۆژی 27-03-2024، لە كۆنگرەیەكی ڕۆژنامەوانیدا بڕیاری دابەشكردنی مووچە و تەرخانكردنی زەوی و داشكاندنی كرێی خوێندن و قەرزی ئاو و كارەبا و چەندین ڕسوومات و قەرزی دیكەی ڕاگەیاند.

 

ڕاگەیێنراوی فەرمی: دوای بڕیارەكەی سەرۆكوەزیران بارزانی، وەزارەتی خوێندنی باڵا و توێژینەوەی زانستی لەسەر داشكاندنی كرێی خوێندن فەرمانێكی وەزاری بڵاوکردەوە كە تیایدا هاتووە:
- داشكاندنی 20%ـی كرێی خوێندنی بەرایی پارالێڵ و ئێواران و خوێندنی باڵا، دیبلۆمی باڵا، ماستەر و دكتۆرا، لە سەرجەم زانكۆ و پەیمانگە حكومییەكان و ئەنجوومەنی باڵای كوردستان بۆ پسپۆڕییە پزیشكییەكان دەکرێت.
- دووبارە داشكاندنی 20%ـی كرێی خوێندنی ئەو قوتابییانەی هێشتا كرێكەیان نەداوە.

 

ژمارەكان وا دەڵێن: كرێی 100%ـی خوێندنی پارالێڵی قۆناغەكانی دبلۆمی باڵا و ماستەر و دكتۆرا بۆ ساڵی خوێندنی 2023 ـ 2024، سێ ملیار و 238 ملیۆن و 810 هەزار دینارە و دوای داشكاندنەكەی سەرۆكوەزیران، یەک ملیار و 781 ملیۆن و 345 هەزار دینار ماوەتەوە و بەمەش زیاتر لە 35 هەزار قوتابی سوودمەند بوون لەم داشكاندنە.

 
ئەوەی پێویست بیزانیت: ئەو قوتابییانەی ئەم داشكاندنە دەیانگرێتەوە، دەبێت تاوەکو پێنجی ئایاری ئەمساڵ گشت پارەكە بە یەک قیست بدەنە زانكۆكانیان، ئەم داشكاندنەش تەنیا بۆ ساڵی خوێندنی 2023 ـ 2024 و بۆ سەرجەم قۆناغەكان دەبێت.