ئاڤای خەڵک؛ لاشەی ئاژەڵی مرداربوو لە نزیک زێی بچووک لە قەڵادزێ کێشەی تەندروستی دروست کردووە

ئاڤا نیوز

ماوەیەکە لە نزیک زێی بچووک و ئاوی پڕۆژەی خاس، کە سەرچاوەی سەرەکی دابینکردنی ئاو خواردنەوەی قەڵادزێیە، لاشەی ئاژەڵی مرداربوو فڕێ دەدرێت و مەترسی بۆسەر ژیان و تەندروستی خەڵکی ناوچەکە و پیسبوونی سەرچاوەی ئاوەکە دروست کردووە.

زانیاریی بەدەستهاتوو: دانیشتووانی ناوچەکە بە ئاڤایان وت، بابەتەکە خەریکە دەبێتە دیاردە و گومانی لای خەڵک دروست کردووە.

لێدوانی فەرمی: مارف مەحمود، بەرێوەبەری ئاوی قەڵادزێ بە ئاڤای راگەیاند، ئەم لاشە مرداربووانە لە دەوری زێیەکە فڕێدەدرێن مەترسیدارن لەکاتی باران بارین و لافاودا بچنە ئاوی زێکەوە.

وتیشی، لەگەڵ لایەنی پەیوەندیدار لەسەر هێڵین بۆ ئەوەی ڕووبەڕووی ئەو کەسانە ببینەوە کە ئەو کارە دەکەن، کامێرای چاودێریش لە شوێنەکە دادەنێین بۆئەوەی بیاندۆزینەوە.