لە بەسرە گرژیی دروست بوو؛ "داواکراوێکی ماددەی هۆشبەر ویستوویەتی دەنگ بدات"

ئاڤا نیوز

نیوەڕۆی ئەمڕۆ سێشەممە لە ناوچەی نەهر ئەلعزی پارێزگای بەسڕە لە باشووری عێراق، ڕووداوێکی ئەمنیی ڕوویدا و تیایدا هێزە ئەمنییەکان کەسێکیان لە عەشیرەتی شغابنییە دەستگیرکرد، ئەم کەسە بەگوێرەی ماددەی 406ی ماددەی هۆشبەر دەستگیرکراوە، لە کاتێکدا لە یەکێک لە بنکەکانی دەنگدان ویستوویەتی دەنگ بدات.

زانیاریی تایبەت: سەرچاوەیەکی ئەمنیی لە پارێزگای بەسڕە بە ئاڤا میدیای ڕاگەیاند، لە کاتی ڕووداوەکەدا شەڕ و پێکدادان لەنێوان هێزە ئەمنییەکان و چەند چەکدارێکی عەشیرەتی شغابنییە ڕوویداوە و لە ئەنجامدا یەکێک لە ئەندامانی ئەو عەشیرەتە برینداربووە.

وتیشی، دوای ڕووداوەکە، هێزە ئەمنییەکان ڕێکاری پێویست و بەپەلەیان بۆ کۆنتڕۆڵکردنی دۆخەکە و گەرەنتی بەردەوامی پرۆسەی دەنگدان بەشێوەیەکی ئارام گرتووەتەبەر.