پۆلیسی کەرکووک دانپێدانانی بکوژانی ئافرەتێک بڵاو دەکاتەوە

ئاڤا نیوز

فەرماندەیی پۆلیسی پارێزگای کەرکووک، ڤیدیۆی دانپێدانانی دوو تۆمەتباری بڵاوکردەوە، کە  لە چەند ڕۆژی ڕابردوو لە شووقەیەکی کەرکووک ئافرەتێکیان کوشتبوو.

چیرۆکی سەرەکی: ڕۆژی 30ـی 12ـی 2025، دوو کەس هەڵدەکوتنە سەر شووقەیەک لە شووقەکانی موسەلا لە شاری کەرکووک و ئادرەتێک بە چەقۆ دەکوژن،  دوای چاودێریکردنی کامێراکان و کۆکردنەوەی زانیاریی ورد هەردوو کەسەکە دەستگیر دەکرێن.

ڕاگەیێنراوی فەرمی: بەپێی ڕاگەیێنراوی پۆلیسی کەرکووک، تۆمەتبارەکان پێشتر لە گەڕەکی قادسییە دراوسێی قوربانییەکە بوون و پەیوەندیی نێوانیان وەک دراوسێی کۆن بەردەوام بووە، یەکێک لە تۆمەتبارەکان ئاماژەی بەوە کردووە پێش ئەنجامدانی تاوانەکە، پەیوەندیی بە ژنەکەوە کردووە و داوای بڕێک پارەی لێ کردووە.

تۆمەتبارەکە دان بەوەشدا دەنێت، دواتر لەگەڵ هاوڕێکەی هەڵیانکوتاوەتە سەر ماڵەکەی و بە دوو چەقۆ ژنەکەیان کوشتووە و بەرەو گەڕەکی قادسییە هەڵاتوون.

باکگراوند: فەرماندەیی پۆلیسی کەرکووک لە 30ـی 12ـی 2025 بێ ئاماژەدان بە وردەکارییەکان، هەواڵی کوشتنەکەی ڕاگەیاندبوو.