لیستی مووچەی مانگی 10 ڕەوانەی بەغدا دەکرێت

ئاڤا نیوز

پرۆسەی وردبینی لە لیستی مووچەی مانگی 10 تەواو دەکرێت، بڕیارە لە چەند کاتژمێری داهاتوو ڕەوانەی وەزارەتی دارایی عێراق بکرێت.

وێنە گەورەکە: لە لیستی مووچەی مانگەکانی ڕابردوو بەشێکی وەزارەتەکان لێبڕینی 3%ـی خانەنشینیان نەکردبوو، وەزارەتی دارایی عێراق دووپاتیکردەوە لەوەی دەبێت سەرجەم مووچەخۆران ئەو لێبڕینەیان بۆ بکرێت، لەبەر ئەم هۆکارەش ناردنی لیستی مووچەی مانگی 10 دواکەوت.

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "ئەگەر وردبینی لە لیستی مووچەی مانگی 10 تەواو بێت، ئەمڕۆ دووشەممە ڕەوانەی وەزارەتی دارایی عێراق دەکرێت، ئەگەر نا سبەی سێشەممە دەنێردرێت."

ئەمەش بزانە: هەفتەی ڕابردوو وەزارەتی دارایی و ئابووریی؛ ڕاپۆرتی تەرازووی پێداچوونەوەی خەرجی و داهاتەکانی هەرێمی کوردستان بۆ مانگی نۆ و 120 ملیار دینار وەک داهاتی نانەوتی ئەو مانگەی ڕەوانەی بەغدا کرد، بڕیارە لەم چەند ڕۆژە مووچەی مانگی نۆی مووچەخۆران خەرج بکرێت.