کۆمیسیۆن: وەڵامی 400 تانەمان بۆ دەستەی دادوەریی هەڵبژاردنەکان ناردووە

ئاڤا نیوز

 

کۆمیسیۆنی باڵای سەربەخۆی هەڵبژاردنەکانی عێراق بەردەوامە لە وەڵامدانەوەی تانەکانی هەڵبژاردن، کە کاندید و لایەنەکان لەسەر ئەنجامی هەڵبژاردنی پەرلەمان تۆماریان کردووە، تاوەکو ئەمڕۆ چوارشەممەش کۆمیسیۆن وەڵامی زیاتر لە 400 تانەی داوەتەوە و بۆ دەستەی دادوەریی هەڵبژاردنەکانی ناردووە.

 

وێنە گەورەکە: پێشتر جومانە غەلای، گوتەبێژی کۆمیسیۆنی هەڵبژاردنەکانی عێراق بە ئاڤا میدیای ڕایگەیاند، بۆ وەڵامدانەوەی ئەو 872 تانەیەی لەسەر ئەنجامەکانی هەڵبژاردن تۆمارکراون، حەوت ڕۆژی کارکردنیان لەبەردەمە، بەوپێیەش تاوەکو سەرەتای مانگی داهاتوو وەڵامی تانەکان دەدەنەوە و ئاڕاستەی دەستەی دادوەری هەڵبژاردنەکانی دەکەن.

 

لێدوانی فەرمی: نبراس ئەبوو سوودە، یاریدەدەری گوتەبێژی کۆمیسیۆنی هەڵبژاردنەکانی عێراق ئەمڕۆ چوارشەممە ڕایگەیاند، تا ئێوارەی دوێنێ وەڵامی 406 تانەی هەڵبژاردنیان بۆ دەستەی دادوەری هەڵبژاردنەکان ناردووەتەوە و ئەمڕۆش وەڵامی 120 تانەکەی دیکە بۆ دەستەکە دەنێرن، بەوەش وەڵامی 526 تانە تەواودەبێت.

 

ئەوەشی خستووەتەڕوو، دوای ڕادەستکردنی سەرجەم تانەکان، دەستەی دادوەریی هەڵبژاردنەکان 10 ڕۆژی لەبەردەستە بۆ یەکلاییکردنەوەی تانەکان.

 

ئەو مانایە دەگەیێنێت: کۆمیسیۆن بۆ وەڵامدانەوەی تانەکان حەوت ڕۆژی لەبەردەستە، کە لە یەکشەممەی ڕابردووەوە دەستیپێکردووە، بەوپێیەش کۆمیسیۆن تاوەکو ڕۆژی سێشەممەی داهاتوو (2/ 12/ 2025) لەبەردەستە تاوەکو وەڵامی تانەکان بداتەوە و بۆ دەستەی دادوەریی هەڵبژاردنەکانی بنێرێت، دەستەکەش 10 ڕۆژی کارکردنی لەبەردەمە بۆ یەکلاییکردنەوەی تانەکان، واتە تا 17ـی مانگی داهاتوو پێویستە دەستەی دادوەریی هەڵبژاردنەکان وەڵامی تانەکانی دابێتەوە و کۆمیسیۆنیش ئەنجامی کۆتایی هەڵبژاردن بۆ دادگای فیدڕاڵی دەنێرێت.