ژمارەی میلیشيا چەکدارەکانی عێراق تاوەکو دێت زیاتر دەبێت

ئاڤا نیوز 

 

دوای 21 ساڵ لە ئازادکردنی عێراق، نزیکەی 300 پارتی سیاسی لە عێراق هەن، زۆرینەی ئەو پارتە سیاسییانەش خاوەنی هێزی چەکدارن.

 

وێنە گەورەکە: لە دوای ساڵی 2003ـەوە لە عێراق 295 حیزب و جوڵانەوەی سیاسی بەفەرمی لە کۆمیسیۆنی هەڵبژاردنەکانی عێراق تۆمار کراون، 82%ـی ئەو حیزبانەش حیزبی ئایینی، تائیفی، ناوچەیی یان ئیتنیکین.

 

لێدوانی فەرمی: ژمارەی ئەو پارتە سیاسییانەی تاوەکو ئێستا لە کۆمیسیۆن تۆمارکراون، دەگاتە نزیکەی 300 پارت، 39ـیان لە هەرێمی کوردستانن، ئێمە وەک حیزبی عێراقی مامەڵە لەگەڵ هەموویان دەکەین بەبێ جیاوازی". جومانە غەلای، گوتەبێژی کۆمیسیۆنی باڵای هەڵبژاردنەکانی عێراق بۆ ئاڤا نیوز وای گوت.

 

لەلایەکی دیکەوە: سەرچاوەیەکی بەرپرس لە فەرمانگەی حیزبە عێراقییەکان لە کۆمیسیۆنی هەڵبژاردنەکان بە "عەرەبی جەدید"ـی ڕاگەیاند: "ژمارەی ئەو حیزبانەی باڵی سەربازی و هێزی چەکداریان هەیە بەراورد بە ساڵی 2016، دوو هێندە زیاد بووە".

 

ژمارەکان وا دەڵێن: لە بودجەی ساڵی 2023ـی عێراق ژمارەی هێزەکانی حەشدی شەعبی بە 238 هەزار و 75 چەکدار دیاری کراوە، بڕی سێ تریلیۆن و 743 ملیار و 703 ملیۆن و 290 هەزار دیناریان بۆ تەرخان کراوە.

 

ئەوەی پێویستە بیزانیت: بەپێی پرۆژەیاسای حیزبە سیاسییەکان لە عێراق، بۆ دامەزراندنی هەر پارتێکی سیاسی دەبێت دەستەیەکی دامەزرێنەری حەوت کەسی و دوو هەزار ئەندامی هەبێت، یاساکە پارتە سیاسییەکانی کوردستانیش دەگرێتەوە.