ئەم مانگە لیستی پلەبەرزکردنەوەی فەرمانبەران بۆ بەغدا دەنێردرێت

ئاڤا نیوز

 

سەرجەم وەزارەت و فەرمانگەکانی حکومەت ئاگادارکراونەتەوە لەگەڵ لیستی مووچە، لیستی پلەبەرزکردنەوەی فەرمانبەرانیش بنێرن، هەر دامەزراوەیەکیش لیستەکە تەواو بکات ڕاستەوخۆ ڕەوانەی بەغدا دەکرێت. 

 

وێنە گەورەکە: دوای هەشت ساڵ جارێکی دیکە پرۆسەی پلەبەرزکردنەوەی فەرمانبەران دەستپێدەکاتەوە و هەر فەرمانبەرێک پلەیەک یان دوو پلە بەرز دەکرێتەوە و بڕیارە تاوەکو 20 ڕۆژی دیکە پڕۆسەکە تەواو بکرێت.

 

لێدوانی فەرمی: مەولوود سابیر، بەڕێوەبەری گشتیی بانکە بازرگانییەکانی هەرێمی کوردستان، بە ئاڤا نیوزی ڕاگەیاند: سەرجەم ئەو وەزارەت و دەستانەی پەیوەستن بە وەزارەتی دارایی داوایان لێکراوە دەست بە جێبەجێکردنی ڕێکارەکانی پلەبەرزکردنەوەی فەرمانبەرانیان بکەن، بۆ ئەوەی ئەم مانگە لەگەڵ لیستی مووچە، لیستی پلەبەرزکردنەوە هاوپێچ بکرێت و بۆ بەغدا بنێردرێت.

 

بۆچی گرنگە: زیاتر لە 500 هەزار مووچەخۆر لە پرۆسەی پلەبەرزکردنەوە سوودمەند دەبن، هەر فەرمانبەرێک (25 هەزار دینار بۆ 125 هەزار دینار) بۆ مووچە بنەڕەتییەکەی زیاد دەبێت.  

 

ئەوەی پێویستە بیزانیت: فەرمانبەران و مامۆستایان دوو پلەبەرزکردنەوەیان بۆ نەکراوە، ئەوانەی پلە وەزیفییەکانیان لەنێوان (6-10)، چوار ساڵ جارێک پلەکانیان بەرز دەکرێتەوە، ئەوانەشی پلە وەزیفییەکانیان لەنێوان (1-5)، یەک پلەیان  بەرز دەکرێتەوە کە ئەمانە پێنج ساڵ جارێک پلەکانیان بەرز دەکرێتەوە.