بە سپۆنسەری ئاڤا سێیەمین لوتکەی "BIP بۆ ئابووری و وەبەرهێنان" بەڕێوەدەچێت

ئاڤا نیوز

ئەمڕۆ لە هۆتێل دیڤان لە هەولێر، بە سپۆنسەری ئاڤا میدیا و سەرپەرشتی دەستەی وەبەرهێنان سێیەمین لووتکەی "BIP بۆ ئابووری و وەبەرهێنان" بەڕێوەدەچێت. بڕیارە چەندین کۆمپانیای بیانی لە سێکتەری جیاواز بۆ ماوەی دوو ڕۆژ بەشداری لووتکەکە بکەن.

وێنە گەورەکە: هەرێمی کوردستان وەک شوێنێکی گونجاو سەیر دەکرێت بۆ هاتنی وەبەرهێنەران، بۆیە حکومەتی هەرێمی کوردستان لەماوەی چەند ساڵی ڕابردوو بایەخێکی زۆری بە پێشخستنی ئەم کەرتە داوە.

لێدوانی فەرمی: ڕامیار ئەرسەلان، بەڕێوەبەری کارگێڕی BIP بە ئاڤای گوت، ئەمڕۆ 30 دانیشتنی ڕووبەڕوو دەکرێت و 50 لێکتێگەیشتن واژۆ دەکرێت. ئەمساڵ لە هەشت سێکتەر کار کراوە، لەوانە تەکنۆلۆژیای زیرەک و ژیریی دەستکرد، بواری خانووبەرە، وزەی سەوز، سیستەمی بانکی و چەند بابەتێکی دیکە. ئامانجمان ئەوەیە ژێرخانی وەبەرهێنانی هەرێمی کوردستان بەهێز بکەین. جگە لەو دانیشتنانەی لەم لووتکەیە دەکرێن، میوانەکان دەبرێنە شوێنە کولتوورییەکانی وەک قەڵای هەولێر.

ڕامیار ئەرسەلان دەشڵێت: ئەو پاڵپشتیەی ئەمساڵ حکومەتی هەرێمی کوردستان هەیەتی بۆ لووتکەکە وایکردووە لووتکەکە جیاواز بێت.

زانیاریی زیاتر: بڕیارە لە ڕۆژانی لووتکەکە ژمارەیەک دیدار و پانێڵ بەڕێوەبچن. ژمارەیەک کۆمپانیای گەورە و وەبەرهێنەر و خاوەنکاران لە وڵاتانی ناوچەکە و کەنداو و ئەوروپا و جیهان بەشداری لووتکەکە دەکەن. لووتکەی "BIP بۆ ئابووری و وەبەرهێنان" ئامانجی ئەوەیە وەبەرهێنەرانی جیهان لە هۆڵدینگ، کۆمپانیا گەورەکان، وەبەرهێنەرە تاکەکان لە سێکتەرە جیاوازەکان کۆبکاتەوە بۆ ڕەخساندنی دەرفەتی وەبەرهێنان.

ئەوەی پێویستە بیزانیت: زیاتر لە 15 هۆڵدینگ لە هەرێمی کوردستان و عێراق و نزیکەی 15 هۆڵدینگ و گروپ لە 13  وڵاتی جیاواز و 50 گەورە کۆمپانیای جیهان بەشداری لووتکەکە دەکەن، پێشبینی دەکرێت لە لووتکەی ئەمساڵ 275 ملیۆن دۆلار لید بکرێت.

باکگراوند: لووتکەی یەکەم و دووەمی BIP لە وڵاتی ئیمارات بەڕێوەچوو، کۆمەڵێک ڕێککەوتن و لێکتێگەیشتن لە نێوان کۆمپانیاکان ئەنجام دران، لە لوتکەی یەکەم 100 ملیۆن دۆلار و لە لووتکەی دووەم 350 ملیۆن دۆلار لید کراوە.