دەمپارتی: ناوەڕۆکی قسەکانی ئۆجەلان شێوێنراون

ئاڤا نیوز

 

ئەندامانی شاندی دەمپارتی لە کۆمیسیۆنە پەرلەمانییەکە ڕایدەگەیەنن بە پاساوی پوختەکردنەوە، ناوەڕۆکی قسەکانی عەبدوڵڵا ئۆجەلان لە کۆبوونەوە لەگەڵ شاندی کۆمیسیۆنەکە شێوێنراون و داوا دەکەن تەواوی قسەکانی وەک خۆی بڵاو بکرێنەوە.

 

چیرۆکی سەرەکی: لە کاتێکدا زۆربەی پارتە سیاسییەکانی تورکیا داوایان کرد ئەمڕۆ تەواوی قسەکانی ئۆجەلان بۆ ڕای گشتیی بڵاو بکرێنەوە، کەچی سەرۆکایەتیی پەرلەمانی تورکیا ڕەتی کردەوە و 11 ڕۆژ دوای کۆبوونەوە لەگەڵ ئۆجەلان، ئەمڕۆ 4-12-2025  ئەحمەد بۆزکورت، یاریدەدەری سکرتێری پەرلەمانی تورکیا بە نووسراوێکی سێ لاپەڕەیی پوختەی قسەکانی ئۆجەلان خوێندنەوە. 

 

ڕاگەیەنراوی فەرمی: پێنج ئەندامەکەی دەمپارتی لە کۆمیسیۆنی یەکڕیزیی نیشتمانی، برایەتی و دیموکراسی لە ڕاگەیەنراوێکدا ئاماژەیان بەوە داوە بەردەوام جەختیان لەوە کردووەتەوە پێویستە تەواوی قسەکانی ئۆجەلان وەک خۆی بڵاو بکرێتەوە و ڕای گشتیی لێ ئاگادار بکرێتەوە، نەک بە پاساوی پوختەکردنەوە بۆ مەبەستی تایبەت کەڵکی لێ وەربگیرێت. 

 

بە تەنیشت ئەم بابەتەوە: لە ڕاگەیەنراوەکەدا سەرنج خراوەتە سەر ئەوەی بژارکردن و هێنان و بردنی چەند وشەیەک لە قسەکانی، بەر لە هەموو شتێک مەودای ڕۆڵی مێژوویی ئۆجەلان لە پرۆسەکەدا بەرتەسک دەکاتەوە و مشتومڕ بەدوای خۆیدا دێنێت. ئەمەش دژی ئەو بەڵێن و بەرپرسیارێتی و هەڵوێستانەیە کە پرۆسەکەیان لەسەر بونیاد نراوە.

 

پێویستە ئەمەش بزانیت: ئاماژە بەوە دراوە گوڵستان کڵچ کۆچیغیت، پەرلەمانتاری دەمپارتی کە یەکێک بوو لەو سێ ئەندامەی شاندەکە سەردانی ئۆجەلانیان کردووە، بەشداریشی پێ نەکراوە لە ئامادەکردنی پوختەکردنەوەی قسەکانی ئۆجەلان. بژارکردنی وشە و لێبڕین لە کاتی لێوەرگرتنی لێدوانەکانی، دەبێتە هۆی چەواشەکردن و بەلاڕێدابردنی قسەکانی ئۆجەلان و بە تەواوی ئەمە ڕەت دەکەینەوە.

 

لەلایەکی دیکەوە: لە ڕاگەیەندراوەکەدا باس لەوە کراوە دەبێت بەرامبەر هەموو لایەک و کۆمەڵگا زمانێکی بەرپرسیارانە و دروست بەکار بهێنرێت. هیچ حزبێک قسەکانی ئۆجەلان نەکات بە کەرەستەی سیاسی بۆ خۆی و تەواوی قسەکانی ئۆجەلان وەک خۆی و بەبێ کەموکوڕی بدرێت بە سەرجەم 51 ئەندامی کۆمیسیۆنەکە. ئەم پرۆسەیە زۆر لەوە جیدیتر و مێژووییترە، بەم جۆرە بەلاڕێدا ببرێت و بکرێت بە کەرەستەی سیاسەت و خوێندنەوەی کەسی بۆ بکرێت.