دایکی سێ منداڵی بێ باوک: توخوا با هەوراز گوڵپی فریامان بکەوێت

ئاڤا نیوز

 

دایکی سێ منداڵی بێ باوک لە چەمچەماڵ، لافاوەکە زیانێکی زۆری بە ماڵەکەیان گەیاندووە، دۆخیان زۆر خراپە، بەدەم گریانەوە هاوار دەکات: توخوا با کاک هەوراز بێتە سەر خەت و فریامان بکەوێت.

 

چیرۆکی سەرەکی:  سێ شەوە خێزانێکی نەدار و هەژار، لە سەخترین دۆخی گوزەران و ژیاندان و لە ژووری سەربانی دراوسێیەکیان دەژین، پاش ئەوەی لافاو لە ناحیەی شۆڕش زیانی زۆری بەو پێخەف، کەلوپەل و خانووە گەیاند کە پێشتر خێرخوازان بۆیان دابین کردبوو.

ژنەکە ماوەی 11 ساڵە هاوژینەکەی کۆچی دوایی کردووە و سێ منداڵ بەخێو دەکات و وەکو خۆی ئاماژەی پێدەکات تەنها 100 هەزاری هاوکاریی منداڵی بێ باوک وەردەگرێت.

ئەو ژنە قسەی بۆ دیار محەممەد، پەیامنێری ئاڤا کردووە، دەڵێت: ئەو کوڕەم لە زانکۆیە، خوا ئاگای لێیە نازانێت لەبەر بێ شوێنیی لە کوێدا بخەوێت، خۆم زەختی دڵم لەگەڵە، پاکەتێک حەب ئەکڕم بە 16 هەزار، زۆر جار ئەو پارەیەم پێ نییە و نایکڕم بە ئازارەوە ئەتلێمەوە و خێرخواز و دراوسێکان عیلاجەکەم بۆ ماوەیەک بۆ دەکڕێت یان ئەمبەن بۆ خەستەخانە و عیادە.

بە دەم گریانەوە پەنجەی بۆ کچەکەی ڕاکێشا و وتی لەبەر بێ پارەیی لە خوێندن هێناومەتە دەرەوە و کوڕەکەم لە زانکۆی چەرمۆ دەخوێنێت، لە تاودا لەبەر بێ شوێنیی لە مزگەوت دەخەوێ.

 

زیانە سەرەکییەکان: ئەو دایکە دەڵێت بە ماتۆڕێکی سێ تایە بژێویم بۆ منداڵەکانم پەیدا دەکرد، ئەویش لافاو بردی و نەما.

ژنە ڕەشپۆشەکە وتی، هەشت ملیۆن قەرزارین و باوکی منداڵەکانیشم نەخۆشیی دڵی هەبوو، لەبەر بێ پارەیی و نەداریی نەدەچوو بەدەم چارەسەرەوە، ئەو ڕۆژەی جەڵدەکە لێیدا 30 هەزار دینار لەم ماڵەدا بوو، خەفەتی هەر لە دڵمدایە و کۆچی دوایی کرد، نامەوێت ئەو منداڵانەم زیاتر سەرگەردان ببن.

ئەوەشی وت کە هەموو ماڵەکەیان ئاوی تێچووە و بەناچاریی ژوورێکیان لە ماڵێکی دراوسێ چاککردووە بۆ ئەوەی تێیدا بمێننەوە.

 

داواکاریی خێزانەکە:  بۆ خواردن و بژێویی ڕۆژانە، هیچمان نەماوە و خەڵکی خێرخواز خوار شتمان بۆ ئەهێنن، بەڵام ئەوەی هەمانە هەمووی خێرخوازان بۆیان هێناوین.

دایکەکە بە دەم گریانەوە هاواری دەکرد: کاک هەوراز، توخوا وەرە سەرخەت و بەهاوارمانەوە وەرە و فریامان بکەون و خانوویەکمان بۆ دروستبکەنەوە.

کوڕی گەورەی ماڵەکە وتی: شانازی بە دایکمەوە دەکەم و بەو هەموو نەبوونییەوە هەر دەڵێت خوێندنەکەت تەواو بکە، ئەگەرچی لەبەر بێ گوزەرانیی ساڵێک دابڕام.

 

چارەسەرەکان:  ئاڤا میدیا لە شەوی ڕابردووەوە کامپەینێکی گەورەی بۆ کۆکردنەوەی هاوکاری بۆ لێقەوماوانی لافاوەکەی چەمچەماڵ و دەوروبەری ڕاگەیاندووە. 

پەیامنێری ئاڤا بە خاوەن ماڵەکەی وت کە هاوکارییەکانی ئاڤا میدیا دەگەیەنرێتە ئەو خێزانە و هەموو شتێکیان بۆ دابین دەکرێت.

 

ئەوەی پێویستە بیزانیت: خێرخوازان، سەرمایەداران، وەبەرهێنەران چین و توێژە جیاوازەکان، دەتوانن بە سێ ڕێگای جیاواز هاوکاریی بگەیەننە کامپینەکەی ئاڤا:

پەیوەندی بکەن بەم ژمارانە؛

07701718885 

07508035020

 

 - ناردنی پارە لەڕێگەی کیو ئاڕ کۆدی (FIB)

گەیاندنی هاوکاری بە ئۆفیسی سەرەکی ئاڤا میدیا لە ڕێگای سەرەکی هەولێر - پیرمام، پشت فیردەوس سیتی.