سەرما و سۆڵە ڕوو لە هەرێمی کودستان دەکات

ئاڤا نیوز

کەشناسیی هەرێمی كوردستان ڕایگەیاند: بەهۆی کاریگەری بەرزە پەستانی هەوای ڕووسیا، بارستە هەوایەکی وشک و سارد ڕوو لە هەرێمی کوردستان دەکات و پلەکانی گەرما بۆ ژێر پلەی سفری سیلیزی نزم دەبنەوە.

ئەوەی پێشبینی دەکرێت: بەهۆی گۆڕانکاری لە کەش و هەوادا، تاوەکو شەوی یەکشەممەی داهاتوو، لە چەند ناوچەیەکی هەرێمی کوردستان پلەکانی گەرما بۆ ژێر پلەی سفری سیلیزی دادەبەزن و خێرایی با زیاد دەکات.

ڕاگەیێنراوی فەرمی: بەڕێوەبەرایەتیی گشتیی کەشناسی و بوومەلەرزەزانی هەرێمی کوردستان ڕایگەیاند: لە ئەنجامی کاریگەری نزمە پەستانی هەوا لە باشووری عێراق خێرایی با لەو ناوچانە بەرز بووەتەوە، ناوچەکانی ئیدارەی سەربەخۆی گەرمیان، چەمچەماڵ و کەرکووکیش دەگرێتەوە، بەجۆرێک لەو ناوچانە خێرایی با بۆ  40 کیلۆمەتر لە کاتژمێرێکدا زیاد دەکات.

بەپێی پێشبینی کەشناسیی هەرێمی کوردستان، بۆ  ئەمڕۆ پلەکانی گەرما بەم شێوەیە دادەبەزن و تا ڕۆژی یەکشەممەی داهاتوو بە نزمی دەمێننەوە:

٠ سەنتەری هەولێر 3 پلەی سیلیزی
٠ سەنتەری سلێمانی 3 پلەی سیلیزی
٠ سەنتەری دهۆک 1 پلەی سیلیزی
٠ سەنتەری کەرکووک 9 پلەی سیلیزی
٠ سەنتەری هەڵەبجە 4 پلەی سیلیزی
٠ ئیدارەی سەربەخۆی سۆران 1- پلەی سیلیزی
٠ ئیدارەی سەربەخۆی زاخۆ  1 پلەی سیلیزی
٠ ئیدارەی سەربەخۆی ڕاپەڕین 4 پلەی سیلیزی
٠ ئیدارەی سەربەخۆی گەرمیان 8 پلەی سیلیزی
٠ ناوچە شاخاوییەكان 5- پلەی سیلیزی

لەلایەکی دیکەوە: شێخ دارا، شارەزا و پێشكەشكاری کەشوهەوا لە ئاڤا ڕایگەیاند: هەوایەکی وشک، کە بە سیبیری ناسراوە هەڵدەکات و پلەکانی گەرما نزم دەکاتەوە، لە هەندێک ناوچە پلەکانی گەرما بۆ ژێر پلەی سفری سیلیزی نزم دەبنەوە، لە کۆتایی ئەم مانگەش شەپۆلی چوارەمی بارینی بەفر و باران ڕوو لە هەرێمی کوردستان دەکات.