ئاڤا بەدواداچوون بۆ ڕەنگی ئاردی ئەم مانگە دەکات

ئاڤا نیوز

دوای بەدواداچوونی ئاڤا میدیا بۆ نیگەرانیی چەند هاونیشتمانییەک دەربارەی بەشە ئاردی ئەم مانگە، پشکنین بۆ ئاردەکە دەکرێتەوە.

چیرۆکی سەرەکی: ژمارەیەک هاونیشتمانی پەیوەندییان بە ئاڤا میدیا کردووە و دەڵێن؛ بەشە ئاردی ئەم مانگە ڕەنگی ڕەشە و نانی لێ دروست ناکرێت. بە گوتەی ئەوان، گومان دەکرێت ئاردەکە لە کاتی دروستکردندا لە ئاشەکان سووتابێت.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی بە ئاڤای ڕاگەیاند: "مانگانە پشکنین بۆ ئاردی هەموو ئاشەکان دەکەین و نانی لێ دروست دەکەین، ئینجا ڕەزامەندیی دابەشکردنی دەدەین؛ هیچ ئاردێک بەبێ دەرچوون لە پشکنین دابەش ناکرێت".

زانیاریی زیاتر: دوای بەدواداچوونەکەی ئاڤا، تیمێکی هونەری پشکنینیان بۆ ئاردەکە کردەوە؛ بە گوتەی بەڕێوەبەری گشتیی بازرگانی، ئاردەکە بەپێی ستانداردە و هیچ کێشەیەکی نییە، ڕەنگەکەشی پەیوەندیی بە سووتانەوە نییە، بەڵکو بەهۆی جۆری ئەو گەنمەیەوەیە کە ئاردەکەی لێ دروست کراوە.