یەکەم لێدوانی چوارچێوەی هەماهەنگی لەبارەی هەنگاوەکەی سەدر

ئاڤا نیوز

دوای هەنگاوەکەی موقتەدا سەدر ڕێبەری ڕەوتی سەدر، لە بڵاوکردنەوەی ناوی ڕەوتی نیشتیمانی شیعە، چوارچێوەی هەماهەنگی دەڵێت "بڕیارەکە سێ ئامانجی لە پشتە".

وێنە گەورەکە: بڵاوکردنەوەی دروشمێک لە ژێر ناوی "ڕەوتی نیشتیمانی شیعە" کە واژۆ و ناوی موقتەدا سەدر ڕێبەری ڕەوتی سەدری لەسەرە، کاردانەوەی بەدوای خۆیدا هێنا.

لێدوانی فەرمی: عەلی فەتلاوی، بەرپرس لەناو چوارچێوەی هەماهەنگی بە میدیاکانی گوتووە:" هەنگاوەکەی سەدر ئامانج لێی شکاندنی گۆشەگیری سیاسییە، ناوە نوێیەکەش ناوێکی فراوانە، بە دڵنیاییەوە ئامانجی هەیە و لە نێو ئەو ئامانجانەشدا ئەوەیە کە سیستەمێکی سیاسی نوێ هەبێت کە لە ڕێگەیەوە ڕەوتەکەی بچێتە ناو کاری سیاسییەوە لە ژێر ناونیشانی نیشتیمانپەروەری".

زانیاریی زیاتر: "سەدر دەیەوێت لە ڕەوتە نوێیەکەیدا بەشێک لە چوارچێوەی هەماهەنگی یان هێزە سیاسییەکانی شیعە، کە لە ژێر ناونیشانی سەربەخۆدان لە خۆی کۆبکاتەوە. عەلی فەتلاوی وای گوت.

ئەوەی پێویستە بیزانیت: ڕەوتی سەدر، دوای دوو ساڵ دابڕان لە پرۆسەی سیاسی، ئامادەکاری دەکات بۆ بەشداریکردن لە هەڵبژاردنی پێشوەختەی پەرلەمانی عێراق کە بڕیارە ساڵی داهاتوو بکرێت.

باکگراوند: ڕەوتی سەدر لە هەڵبژاردنی ساڵی 2021ـی پەرلەمانی عێراقدا 73 کورسی بەدەستهێنا، بەڵام دواتر پەرلەمانتارانی کشاندەوەوە و وازهێنانی لە کاری سیاسی ڕاگەیاند.