سوودانی یەک هەفتە لە ئەمریکا دەبێت

ئاڤا نیوز

سوودانی سەردانی واشنتن دەکات و بەرپرسێکی باڵای ئیدارەی بایدنیش دەڵێت " سەردانەکە یەک هەفتە دەخایەنێت و ئەمریکا چاوی لەوەیە پەیوەندییەکانی لەگەڵ عێراق بباتە قۆناغێکی دیکەوە".

وێنە گەورەکە: بڕیارە ڕۆژی دووشەممەی داهاتوو 15-4-2024، محەممەد شیاع سوودانی، سەرۆکوەزیرانی عێراق سەردانی ئەمریکا بکات، هاوبەشی ئەمنی و پەیوەندی ستراتیژی نێوان دوو وڵاتەکە و چەندین پرسی دیکە، كە بەشێكیان پەیوەندییان بە هەرێمی كوردستانەوە هەیە تاوتوێ دەكرێن.

لێدوانی فەرمی: بەرپرسێکی باڵای ئیدارەی جۆ بایدن، کە نەیویستووە ناوی ئاشکرا بکرێت بە ڕۆژنامەنووسانی گوتووە" لە سەردانەکەیدا سوودانی لەگەڵ  جۆ بایدنی سەرۆک و ئەنتۆنی بلینکن وەزیری دەرەوە، لۆید ئۆستن وەزیری بەرگری و چەندین بەرپرسی دیکەی کوشکی سپی کۆدەبێتەوە".

زانیاریی زیاتر: "ئەمە دەرفەتێکی زۆر باشە بۆ قسەکردنە لەسەر ئاراستەی داهاتووی پەیوەندییە دوو قۆڵییەکانمان و بنیاتنانی ئەو هاوبەشییە هەمەلایەنەیەی کە هەمانە و تا ئێستاش دەمانەوێت پەرەی پێبدەین و فراوانتری بکەین". ئەو بەرپرسە ئەمریكییە وای گوتووە.

ئەوەی پێویستە بیزانیت: لە سەردانەکەدا سوودانی سەرۆکایەتی شاندێکی گەورە دەکات کە وەزیرانی نەوت، دارایی، بازرگانی و کارەبا و چەند بەرپرسێکی دیکە لەخۆدەگرێت.

گۆشەیەکی دیکەی دیمەنەکە: لە کۆبوونەوەی سوودانی و بایدندا، باس لە چۆنیەتیی دەستپێکردنەوەی هەناردەکردنەوەی نەوتی هەرێمی كوردستان دەکرێت.