ئاگر لە دووکانەکانی كەمپێكی ئاوارە ئێزدییەكان دەكەوێتەوە

ئاڤا نیوز

 

بەرەبەیانی ئەمڕۆ ئاگر لە کەمپێكی ئاوارە ئێزدییەكان لە سنووری ئیدارەی زاخۆ كەوتەوە، بەپێی زانیارییەكان زیاتر لە 30 دووكانی نێو كەمپەكە سووتاون، بەڵام هیچ زیانێکی گیانیی نەبووە.

 

چیرۆکی سەرەکی: كەمپەكانی باجد كەنداڵ لە دەڤەری سحێلا لە سنووری ئیدارەی سەربەخۆی زاخۆ، بۆ نیشتەجێكردنی ئاوارەكانی دەڤەری شنگال دروستكراون، تائێستا زیاتر لە هەزار خێزانی ئاوارەی كوردانی ئێزدی تێدا نیشتەجێیە كە لەدوای هێرش و داگیركارییەكانی ڕێكخراوی تیرۆرستی داعشەوە بۆ دەڤەری شنگال، ئاوارە بوون.

 

زانیاریی پەیامنێر: پەیامنێری ئاڤا لە ئیدارەی سەربەخۆی زاخۆ زانیاریی لە بەڕێوەبەرایەتیی بەرگریی شارستانیی زاخۆ وەرگرتووە و ڕایگەیاند، ڕووداوی ئاگركەوتنەوەكە لە كاتژمێر 6:30ـی خولەكی بەرەبەیانی ڕوویداوە و بەهۆیەوە زیاتر لە 30 دووكانی نێو كەمپەكان سووتاون، بەڵام تیمەكانیان هەرزوو هەوڵیانداوە ئاگرەكە كۆنتڕۆڵ بكەن و خۆشبەختانە هیچ زیانێكی گیانی نەبووە.

 

زانیاریی زیاتر: بەپێی زانیارییە سەرەتاییەكان هۆكاری ئاگركەوتنەوەكە بەهۆی شۆرتی كارەباوە بووە، لێكۆڵینەوەش لە ڕووداوەكە دەستیپێكردووە.