لە میسان  14 داواکراوی مەترسیدار دەستگیر کران

ئاڤا نیوز

 

سەرچاوەیەکی ئەمنی دەڵێت لەمیانی سێ ئۆپراسیۆنی دابەزینی ئاسمانیی هێزەکانمان لە چەند ڕۆژی ڕابردوودا، 14 لە مەترسیدارترین داواکراوەکانی پارێزگای میسان دەستگیر کراون.

 

لێدوانی فەرمی: سەرچاوەیەکی ئەمنی ئەمڕۆ شەممە میدیای عێراقی ڕایگەیاند: "ئۆپراسیۆنەکانمان بوونە هۆی دەستگیرکردنی 14 داواکراوی مەترسیدار کە بازرگانی ماددەی هۆشبەر، تۆمەتبارانی تیرۆر و تاوانباری کوشتنیان تێدایە."

 

- "ئۆپەراسیۆنەکانی جێبەجێکردنی یاسا لە میسان بەپێی پلانێکی ورد ئەنجامدەدرێن، ئەو دەنگۆیانەس ڕاست نییە کە باس لە کشانەوەی هێزە ئەمنییەکان دەکەن، بەپێچەوانەوە هەوڵە ئەمنییەکان چڕکراونەتەوە بۆ بەدواداچوون بۆ هەموو ئەوانەی داواکراون بەپێی ئەو لیستانەی لەلایەن دادگاکان دەرچووە".

 

زانیاریی زیاتر: ئۆپراسیۆنەکان بەهۆی سەختی و ئاڵۆزیی جوگرافیای ناوچەکە لە گوندەکان و ناوچە دوورەدەستەکان ئەنجامدراون، پەنابردن بۆ دابەزینی ئاسمانی بۆ ئەوە بووە کە گەمارۆی داواکراوەکان بدرێت و ڕێگری بکرێت لە هەڵاتنیان یان خۆحەشاردانیان. 

 

ئەمەش بزانە: پارێزگای میسان ماوەیەکی زۆرە بەدەست کێشە ئەمنییەکانەوە دەناڵێنێت، لەوانە ململانێی خێڵەکی، بازرگانی ماددەی هۆشبەر و چالاکی گرووپە چەکدارەکان.