بەهای دۆلار بەرامبەر بە دینار جارێكی دیكە بەرز دەبێتەوە

ئاڤا نیوز

چەند ڕۆژێكە بەهای دۆلار بەرامبەر بە دینار لە بازاڕەكانی دراو لە هەرێمی كوردستان ناجێگیرە، دوای كەمێك دابەزینی دوێنی، ئەمڕۆ جارێكی دیكە بەرز بووەوە.

لێدوانی فەرمی: کەیفی خۆشناو، وتەبێژی بازاڕی دراوی هەولێر بە ئاڤای وت: هەرچەندە چاوەڕوان بووین ئەمڕۆ بەهای دۆلار بەرامبەر دینار داببەزێت، بەڵام پێچەوانە بووەوە و ئێستا بەهای 100 دۆلار بەرامبەر 146 هەزار و 750 دینارە، واتە بە بەراورد بە ڕۆژی چوارشەممە هەزار و 500 دینار بەرزبووەتەوە.

لەلایەکی دیکەوە: وتەبێژی بازاڕی دۆلارەکەی هەولێر دەڵێت، ڕۆژانە بانکی ناوەندی زیاتر لە 25 ملیۆن دۆلار بەسەر بازرگانی بچووک و ئەو کەسانەی گەشت دەکەن دابەش دەکات، بەڵام ڕۆژی چوارشەممە لە لقی هەولێری بانکی ناوەندی دۆلار دابەش نەکراوە، ئەمەش کاریگەریی لەسەر بەرزبوونەوەی نرخی دۆلار لە بازاڕدا هەبووە.

ئەوەی پێشبینی دەکرێت: بەگوتەی خۆشناو، پێشبینی دەکرێت ڕۆژانی پێنجشەممە، هەینی، شەممە بەهای دۆلار بە ناجێگیری بمێنێتەوە، بەڵام لە ڕۆژی یەکشەممەی داهاتووەوە جۆرێک لە جێگیربوون بەخۆیەوە ببینێت.