پەرلەمانتارێک: حکومەت بە نادەستووریی باج و گومرگی زیادکردووە و پێویستە پەرلەمان بڕیار بدات

ئاڤا نیوز

 

منى غەرابی، پەرلەمانتاری عێراق ئاشکرای دەکات، زیادکردنی باج پێویستی بەبڕیاری پەرلەمان هەیە و هەموو ڕێکارەکانی حکومەت لەو بارەیەوە بە سەرپێچییەکی ئاشکرای دەستووری دادەنرێت.

 

چیرۆکی سەرەکی: بەپێی نووسراوێکی ئەنجوومەنی وەزیران کە دەست ئاڤا کەوتووە، تیایدا باج لەسەر دەیان خواردن و کاڵا زیادکراون، لە نێویدا گەڕانەوەی باجی 20% بۆ سەر کارتەکانی مۆبایل و ئینتەرنێت و جێبەجێکردنی چەندین رێنمایی لە خاڵە سنوورییەکانی عێراق بە بێ ڕەزامەندی پەرلەمانی عێراق، بە ئامانجی زیادکردنی داهاتی نانەوتی.

 

ڕاگەیێنراوی فەرمی: غەرابی لە لێدوانێکی ڕۆژنامەوانیدا ڕایگەیاند، بەپێی ماددەی 28 بڕگەی یەکەم لە دەستووری عێراق، هیچ باج و ڕسوماتێک ناسەپێندرێت، هەموار ناکرێتەوە، کۆناکرێتەوە و لێخۆشبوونی بۆ ناکرێت، ئەگەر بە یاسا نەبێت، بۆیە ئەو هەنگاوانەی حکومەت بۆ بەرزکردنەوەی باج ناویەتی، هیچ پاڵپشتییەکی دەستووری و یاسایی نییە.

 

کاریگەری بڕیارەکە: لە کۆتایی لێدوانەکەیدا، منى غەرابی جەختی کردەوە، وەک پەرلەمانتار، دژی بڕیارەکانی حکومەت سەبارەت بەزیادکردنی باج لەسەر هاووڵاتیان دەوەستینەوە، چونکە کاریگەرییەکی نەرێنی ڕاستەوخۆی لەسەر ژیانی هاوڵاتییان هەیە.

 

باکگراوند: لەکۆتایی ساڵی 2025 ئەنجوومەنی وەزیرانی عێراق لە هەنگاوێکی نوێدا بۆ زیادکردنی داهاتە نانەوتییەکان، بڕیاریدا بە زیادکردن و سەپاندنەوەی باج لەسەر چەندین کاڵا و پێداویستی تەندروستی و دووبارە سەپاندنەوەی کرێی خزمەتگوزاری بە ڕێژەی 20٪ لەسەر کارتی پڕکردنەوەی باڵانسی مۆبایل و ئینتەرنێت، ئەمەش دوای ئەوەی پێشتر ئەو باجە لادرابوو.