ئاڤای خەڵک؛ کار بۆ خەرجکردنی 12 مووچەی ئیکرامیەی  ئەفسەران دەکرێت

ئاڤا نیوز

بەڕێوەبەرایەتیی گشتیی خانەنشینی لە وەزارەتی پێشمەرگە کار دەکات بۆ خەرجکردنی 12 مووچەی ئیکرامییەی ئەو ئەفسەرانەی لە ساڵی 2019 خانەنشین کراون و دڵنیایی دەدات کە لە ئەمساڵدا دەست بە خەرجکردنی دەکرێت.

چیرۆکی سەرەکی: ژمارەیەک ئەفسەری خانەنشینکراوی وەزارەتی پێشمەرگە کە لە ساڵی 2019 ـەوە خانەنشین بوون، تاوەکو ئێستا 12 مووچەی ئیکرامییەیان وەرنەگرتووە. خەرجکردنی ئەم شایستە داراییە لە ساڵی 2021ـەوە ڕاگیراوە و بۆ دەستپێکردنەوەی پێویستی بە بڕیاری ئەنجوومەنی وەزیران هەیە.

لێدوانی فەرمی: حاجی مەلا ئەمین، بەڕێوەبەری گشتیی خانەنشین لە وەزارەتی پێشمەرگە بە ئاڤای ڕاگەیاند: "دەبێت وەزارەتی دارایی و ئابووری هەرێمی کوردستان 12 مووچەکەیان بۆ خەرج بکات. لە ساڵی 2021 خەرجکردنی ئیکرامییەکە ڕاگیراوە و دەبێت ئەنجوومەنی وەزیران بڕیاری لەسەر بدات."

ئاماژەی بەوەش کرد، "بۆ ئەمە ئەم مانگە لەگەڵ ئەنجوومەنی وەزیران دادەنیشین و گفتوگۆ و پێشنیازیان بۆ دەکەین، بۆ ئەوەی مانگانە بڕە پارەیەک تەرخان بکەن و ئەمساڵ دەست بە خەرجکردنی ئیکرامییەکە بکەین."