مەزڵووم عەبدی: هێزەکانمان لە دێر حافر و مەسکەنە دەکشێنینەوە

ئاڤا نیوز

مەزڵووم عەبدی، فەرماندەی گشتیی هێزەکانی سووریا دیموکرات (هەسەدە) بە فەرمی بڕیاریدا هێزەکانی لە شارۆچکەکانی دێر حافر و مەسکەنە و ناوچەکانی دەوروبەر لە ڕۆژهەڵاتی شاری حەلەب بکشێنێتەوە بەرەو ڕۆژهەڵاتی ڕووباری فورات کە لەژێر کۆنترۆڵی هەسەدە دایە.

بڵاوکراوەی فەرمی: مەزڵووم عەبدی، فەرماندەیی گشتیی هەسەدە لە تۆڕی ئێکس ڕایگەیاند: بڕیارماندا هێزەکانمان سبەی کاتژمێر 7ـی بەیانی  لە ناوچەکانی شەڕ و پێکدادانی ئێستا لە ڕۆژهەڵاتی حەلەب کە ماوەی دوو ڕۆژە لەژێر هێرشدان، بەرەو ناوچەکانی ڕۆژهەڵاتی فورات بکشێنینەوە.

عەبدی دەڵێت، لەسەر داوای  وڵاتانی دۆست و نێوەندگیر و نیشاندانی نیاز پاکیمان بۆ تەواوکردنی پرۆسەی یەکگرتن لەگەڵ وەزارەتی بەرگریی سووریا و پابەندبوونمان بە جێبەجێکردنی مەرجەکانی ڕێککەوتنی 10ـی ئادار ئەو بڕیارەمان داوە.

ئەوەی پێویستە بیزانیت: ئێوارەی ئەمڕۆ هەینی، شاندێكی سەربازیی هاوپەیمانی نێودەوڵەتیی دژی داعش لە شارۆچکەی دێر حافر لەگەڵ بەشێک لە سەرکردەکانی (هەسەدە) کۆبوونەوە و بە وتەی فەرهاد شامی، وتەبێژی هەسەدە، پرسی ئەمنی تاوتوێ کراوە. 

لەلایەکی دیکەوە: ئەمشەو، ئەحمەد شەرع، سەرۆککۆماری سووریا مەرسوومێکی کۆماری دەرکرد و دانینا بە بەشێکی ماف و داواکارییە سەرەتاییەکانی کوردی سووریا لەوانەش؛ خوێندن بە زمانی کوردی و بە نیشتمانی ناساندنی زمانەکە، هاوکات جەژنی نەورۆزی بە فەرمی کردە پشوو.