یەکگرتوو وەڵامی دەستپێشخەریی بافڵ تاڵەبانی و شاسوار عەبدولواحیدی دایەوە

ئاڤا نیوز

 

لەبارەی بەشداریکردنی لە حکومەت، یەکگرتوو بەفەرمی وەڵامی دەستپێشخەرییەکەی بافڵ تاڵەبانی و شاسوار عەبدولواحیدی دایەوە و دەڵێت: "تا ئێستا ئۆپۆزیسیۆن بوونمان هەڵبژاردووە."

چیرۆکی سەرەکی: دوای پێنج مانگ لە زیندان شاسوار عەبدولواحید، سەرۆکی جوڵانەوەی نەوەی نوێ، ڕۆژی پێنجشەممەی ڕابردوو، لە کۆنگرەیەکی ڕۆژنامەوانیدا دەستپێشخەری بۆ لایەنە سیاسییەکان کرد، بە مەبەستی پێکهێنانی کابینەی نوێی حکومەتی هەرێمی کوردستان، لە وەڵامی ئەو دەستپێشخەرییە بافڵ تاڵەبانی، وەڵامی دایەوە بۆ ئەوەی بەیەکەوە کابینەی نوێی حکومەتی هەرێم پێکبهێنن. 

ئەوەی پێویستە بیزانیت: بۆ هەڵبژاردنی سەرۆکی هەرێم و ڕاسپاردنی سەرۆکوەزیران، پێویست بە 51 کورسی (50+1) هەیە، پارتی دیموکراتی کوردستان بە تەنیا خاوەنی 39 کورسییە و تەنیا پێویستی بە 12 کورسیی ترە بۆ تەواوکردنی زۆرینە، یەکێتی (23 کورسی) و نەوەی نوێ (15 کورسی) پێکەوە تەنیا 38 کورسییان هەیە؛ تەنانەت بە هاوپەیمانێتیش، نەک هەر ناتوانن حکومەت پێکبهێنن، بەڵکو کورسییەکانیان یەک کورسی لە پارتی کەمترە. هەریەک لە یەکگرتوو، کۆمەڵی دادگەری و ڕەوتی هەڵوێست بڕیاریی ئۆپۆزیسیۆن بوونیان داوە، بەگوێرەی زانیارییەکانی ئاڤا، پارتی سۆشیال دیموکراتی کوردستان، ئەگەرچی خاوەنی یەک کورسییە بەڵام رەتی کردووەتەوە بەبێ پارتی بەشداری حکومەت بکات. 

لێدوانی فەرمی: د. سەڵاحەددین بابكر، وتەبێژی یەكگرتووی ئیسلامی كوردستان، لە لێدوانێكی ڕۆژنامەوانی ڕایگەیاند: هەموو نزیكبوونەوەیەكی نێوان هێز و لایەنە سیاسییەكانی هەرێمی كوردستان بە باش دەزانین، نزیكبوونەوەی نێوان یەكێتی و نەوەی نوێ باشە و بڕیاریی خۆیانە و رێز لە بڕیارەكەیان دەگرین، ئومێد دەكەین ببێتە مایەی كاراكردنی پەرلەمان و پێكهێنانی كابینەی نوێی حكومەت. 

وتەبێژی یەكگرتووی ئیسلامی كوردستان، دەشڵێت: "ئێمە لە یەكگرتووی ئیسلامی كوردستان هەر لەسەرەتاوە بڕیاریی ئۆپۆزیسیۆن بوونمان داوە،  ئەو بڕیارە هەتا ئێستاش بەردەوامە."