هەسەدە: 100 هەزار چەکدار لە هێرشەکانی سوپای سووریا بۆ سەر دێرەزوور بەشدارن

ئاڤا نیوز

 

بەڕێوەبەری ناوەندی ڕاگەیاندنی هێزەکانی سووریای دیموکرات (هەسەدە) ڕایدەگەیێنێت، حکومەتی کاتیی سووریا بە هاوکاریی گرووپە چەکدارەکانی تورکیا و داعش، هێرشێکی بەرفراوانیان بە بەشداریی زیاتر لە 100 هەزار چەکدار بۆ سەر ناوچەکانی باکوور و ڕۆژهەڵاتی سووریا دەستپێکردووە.

لێدوانی فەرمی: فەرهاد شامی، بەڕێوەبەری ڕاگەیاندنی هەسەدە، لە لێدوانێکدا بۆ کەناڵی "ڕۆناهی" ئاشکرای کرد کە حکومەتی سووریا پێداگیرە لەسەر فراوانکردنی هێرشەکانی و هێزەکانی لە سەرجەم میحوەرەکاندا جێگیر کردووە تاوەکو ئاسایشی ناوچەکە تێک بدەن.

بەڕێوەبەری ڕاگەیاندنی هەسەدە ئاماژەی بەوە کرد کە شەڕڤانان تا ئێستا توانیویانە بەرپەرچی هێرشەکان بدەنەوە و دەیان کاروانی ئەو گرووپە چەکدارانە تێکبشکێنن.

شامی هۆشداریی دەدات و دەڵێت: "ئەم هێرشە هاوبەشەی نێوان حکومەتی کاتی و تووندڕەوەکان، مەترسییەکی ڕاستەقینەیە بۆ سەر ژیانی هاووڵاتییان و تەواوی پێکهاتەکان، بۆیە پێویستە گەل لەوپەڕی ئامادەباشیدا بێت بۆ بەرگریکردن لە خاکەکەیان."

زانیاریی زیاتر: هەسەدە، دووپاتی دەکاتەوە کە بە هەموو هێزیانەوە ڕووبەڕووی ئەم پەلامارە دەبنەوە تاوەکو ڕێگری لە هەر پێشڕەوییەکی گرووپە تووندڕەوەکان بگرن کە دەیانەوێت ئارامیی ناوچەکە تێک بدەن و دەستکەوتەکانیان لەناو بەرن.