لیستی مووچەی مانگی یەک ئامادە دەكرێت؛ لە 24 کاتژمێر ڕەوانە دەکرێت

ئاڤا نیوز

سەرچاوەیەک لە وەزارەتی دارایی و ئابووریی هەرێمی كوردستان ڕایدەگەیەنێت، لە چەند كاتژمێری  داهاتوودا، سیستەمی پەیڕۆڵ كارا دەكرێت و دوای كاراكردنی سیستەمەكە بە كەمتر لە 24 كاتژمێر، لیستی مووچەی مانگی یەک ئامادە دەكرێت.

ئەوەی پێویستە بیزانیت: ئەم مانگە دابەشكردنی مووچەی مووچەخۆرانی عێراقیش هێشتا دەستی پێنەكردووە، ئەو درەنگەوتنەش پەیوەندیی بە ئەنجامدانی چەند ڕێكارێكی دارایی و ئیداریی وەزارەتی دارایی عێراق و یەكە ژمێركارییەكانەوە هەیە، بەهەمان شێوە لیستی مووچەی مانگی یەكی مووچەخۆرانی کوردستانیش تا ئێستا ئامادە نەكراوە.

لێدوانی فەرمی: سەرچاوەیەک لە وەزارەتی دارایی و ئابووریی هەرێمی كوردستان تایبەت بە ئاڤا ڕایگەیاند، ئێستا سەرجەم یەكە ژمێریارییەكانی دامودەزگاكانی حكومەتی هەرێمی كوردستان، سەرقاڵی ئامادەكردنی ڕێكخستنەوەی هەردوو لیستی میلاكات و مووچەن بەیەكەوە، بەو پێیەی بەر لە داخڵكردنی لیستەكان لە سیستەمی پەیڕۆڵ، پێویستە ناوی فەرمانبەران و مووچەخۆران لەهەردوو لیستی مووچە و میلاكاتی فەرمانگە حكومییەكان، هاوتای یەكتر بن و ئاماژە بە ئەپدەیتی سەرجەم گۆڕانكارییە وەزیفییەكان كرابن.

زانیاریی زیاتر: ئەو سەرچاوەیە ڕوونیشی كردەوە، تەنانەت ئەگەر فەرمانبەرێک لە مۆڵەتی بێ مووچەش بێت، پێویستە ناوی لە لیستی مووچە هەبێت و لەبەرامبەر ناوەكەی، بە تێبینی ئاماژە بە مۆڵەتی بێ مووچە دەدرێت.

سەرچاوەکەی وەزارەتی دارایی ئاماژەی بەوەشكرد، لە دوای کاراکردنی سیستەمی پەیڕۆڵ، چاوەڕوان دەكرێت لەماوەی كەمتر لە 24 كاتژمێر لیستی مووچەی مانگی یەكی سەرجەم یەكە ژمێریارییەكانی فەرمانگەكانی حكومەت ئامادە بكرێت و لەڕێگەی ئەو سیستەمەوە ڕەوانە بكرێت.