ئومێد خۆشناو لەبارەی ڕاگەیاندنی پشوو لە هەولێر ڕوونکردنەوە دەدات

ئاڤا نیوز

ئومێد خۆشناو پارێزگاری هەولێر، بە ئاڤای ڕاگەیاند، کەشوهەوا ئاساییە و هیچ هۆکارێک نیە بۆ ئەوەی سبەی لە هەولێر  بکرێتە پشووی فەرمی.

لێدوانی فەرمی: ئومێد خۆشناو، پارێزگاری هەولێر، بە ئاڤای وت: بەگوێرەی ڕاپۆرتی پێشبینییەكانی كەشناسی سەر بە وەزارەتی گواستنەوە و گەیاندن، دۆخی كەشوهەوای سنووری پارێزگای هەولێر بەمجۆرە نالەبار نابێت كە لە قوتابخانە و ناوەندەكانی خوێندن، بكرێتە پشوو. 

ئومێد خۆشناو، پارێزگاری هەولێر، دەشڵێت: "ئێمە لەڕێگەی ژووری عەمەلیاتی دیوانی پارێزگا بەپشتبەستن بە زانیاریی و ڕاپۆرتەكانی بەڕێوەبەرایەتیی كەشناسی و بوومەلەرزەزانیی هەرێمی كوردستان، هەڵسەنگاندن بۆ بارودۆخی كەشوهەوا دەكەین، بۆ دڵنیابوونەوە لەوەی پێویست دەكات لە قوتابخانە و ناوەندەكانی خوێندنی سنووری پارێزگای هەولێر بكرێتە پشوو یاخود نا، ئەوەی تا ئێستا ڕوونە، دۆخی كەشوهەوا بەمجۆرە نالەبار نییە كە پشوو ڕابگەیەنین."

 

٠ سەرەڕای ئەوەش دەسەڵاتمان داوەتە بەڕێوەبەرایەتیە گشتییەكانی پەروەردەكانی سنووری پارێزگای هەولێر و قایمقامیەتەكان، بەتایبەت لە ناوچە شاخاوییەكاندا، ئەگەر پێویستی كرد لە ناوەندەكانی خوێندن دەوام ڕابگرن.

 

لەلایەکی دیکەوە: بەهۆی دابەزینی پلەكانی گەرما لە سنووری پارێزگای سلێمانی،  ڕۆژانی 20 و 21ـی ئەم مانگە (سبەی و دووسبەی) لە سەرجەم ناوەندەكانی خوێندنی حكومی و ناحکومی پشووی ڕاگەیێنرا.