دەرماڵەیەکی نوێ بۆ هێزەکانی پێشمەرگە خەرج دەکرێت

ئاڤا نیوز

لەسەر بنەمای هاوتاکردنی مووچەی فەرمانبەرانی هەرێمی کوردستان و عێراق، مووچە و سەرجەم دەرماڵەکانی هێزی پێشمەرگە هاوتای هێزە ئەمنییەکانی عێراق دەکرێت، بڕیارە لە داهاتوویەکی نزیکدا دەرماڵەیەکی نوێ بۆ هێزەکانی پێشمەرگە خەرج بکرێت.

 

وێنە گەورەکە: دوای چارەسەرکردنی کێشەی مووچە لەنێوان هەولێر و بەغدا بە هەوڵی سەرۆکوەزیران بارزانی، وەزیری پێشمەرگە داوایەک ئاراستەی سەرۆکایەتیی ئەنجوومەنی وەزیران دەکات، دوای چارەسەربوونی کێشەی هاتنی مووچەی پێشمەرگە لەلایەن عێراق، بەپێی ڕێنمایی ژمارە 21ـی ساڵی 2008 ئاماژە پێکراو، دەست بە خەرجکردنی دەرماڵەی بڕوانامە و پایە بۆ پێشمەرگە، گشت ئەفسەر و پلەدارانی وەزارەتی پێشمەرگە بکرێت. 

 

ئەوەی پێویستە بیزانیت: لە وەزارەتی پێشمەرگە چوار جۆری دەرماڵە هەیە؛ خێزان و منداڵ، مەترسی، خواردن و بڕوانامە، بەڵام زیاتر لە 30 ساڵە دەرماڵەی بڕوانامە خەرج نەکراوە، ئێستا وەزارەتی پێشمەرگە داوا دەکات دەرماڵەکە خەرج بکرێت. 

 

زانیاریی زیاتر: وەزارەتی پێشمەرگە لە 30 لیوای هاوبەش و نزیکەی 60 هەزار پێشمەرگە پێکهاتووە و بڕیارەکە دەیانگرێتەوە، ئەمە جگە لە یەکەکانی حەفتا و هەشتا کە داواکراوە ئەوانیش بگرێتەوە.

 

ژمارەکان وادەڵێن: دەرماڵەی بڕوانامە لە ڕێژەی مووچەی بنەڕەتی زیاد بکرێت بەمشێوەیە دیاری کراوە:-

- دکتۆرا: 100%
- ماستەر: 75%
- بەکالۆریۆس: 45%
- دیبلۆم: 35%

-ئامادەیی 25% 

- سەرەتایی و ناوەندی: 15%

دەرماڵەی پایە بەمشێوەیە:

- بەڕێوەبەر: 25%
- بەرپرسی بەش: 20%
- بەرپرسی هۆبە: 15%

 

بابەتی ستراتیژی: مووچەی بنەڕەتی هێزی پێشمەرگە لە 140 هەزارەوە دەستپێدەکات تاوەکو ملیۆنێک و 148 هەزار دینار بەپێی پلەبەندی سەربازی، زیادەکەش لە %15 بۆ %100 دەبێت بەپێی پلە و بڕوانامە.

 

زانیاریی بەدەستهاتوو: دوای بڕیارەکەی دادگەی فیدراڵی لەبارەی مووچەی فەرمانبەرانی هەرێمی کوردستان، پێویستە وەزارەتی دارایی عێراق مووچەی فەرمانبەرانی هەرێمی کوردستان و عێراق هاوشێوەی یەکتر خەرج بکات، بۆیە ئێستا وەزارەتی پێشمەرگە داوای لە ئەنجوومەنی وەزیران کردووە ڕەزامەندی لەسەر داواکارییەکە بدات، دواتر بەمەبەستی خەرجکردنی لەگەڵ لیستی مووچە بۆ بەغدا دەنێردرێت، هاوشێوەی پلەبەرزکردنەوەی فەرمانبەران و مووچەی وانەبێژان.

 

لەلایەکی دیکەوە: لە نووسراوێکدا ئەمینداری گشتیی وەزارەی پێشمەرگە  داوای جێبەجێکردنی داواکارییەکە و هاوتاکردنی مووچە و دەرماڵەی سەرجەم هێزەکانی وەزارەتی پێشمەرگەی بە هەردوو یەکەی حەفتا و هەشتا کردووە هاوشێوەی هێزە ئەمنییەکانی عێراق