زیاتر لە 300 کەس لەسەر بەكارهێنان و بازرگانیكردن بە ماددە هۆشبەرەكان دەستگیرکراون

ئاڤا نیوز  

بەڕێوەبەرایەتی گشتی نەهێشتنی ماددە هۆشبەرەکان لە هەرێمی کوردستان ڕایدەگەیێنێت، لە سەرەتای ئەمساڵەوە زیاتر لە 300 کەس لەسەر بەكارهێنان و بازرگانیكردن بە ماددە هۆشبەرەكان دەستگیرکراون.

بۆچی گرنگە: بەپێی ئامارەکان، پرسی بازرگانیکردن و بەکارهێنانی ماددە هۆشبەرەکان لە هەرێمی کوردستان لە بەرزبوونەوەدایە.

لێدوانی فەرمی: "ساڵی 2023، سێ هەزار 552 کەس لە هەرسێ پارێزگای هەولێر، دهۆک و سلێمانی لەسەر بەكارهێنان و بازرگانیكردن بە ماددە هۆشبەرەكان دەستگیرکراون و دەستیش گیراوە بەسەر زیاتر لە 870 کیلۆ گرام ماددەی جۆراوجۆری هۆشبەر". ئەفسەرێک لە بەڕێوەبەرایەتی گشتی نەهێشتنی ماددە هۆشبەرەکان ئەمەی بە ئاڤا نیوز گوت.

زانیاریی زیاتر: "لەمساڵدا لە هەرسێ پارێزگاکە، 315 کەس لەسەر بەكارهێنان و بازرگانیكردن بە ماددە هۆشبەرەكان دەستگیرکراون".

ئەمەش بزانە: لە کۆنفرانسی (بەرەنگاربوونەوەی ماددە هۆشبەرەکان و کارتێکەرە عەقڵییەکان) کە لە ساڵی 2023 لە شاری هەولێر بەڕێوە چوو، سەرۆکوەزیران بارزانی، بەرزبوونەوەی ئامارەکانی پەیوەست بە بازرگانیکردن و بەکارهێنانی ماددە هۆشبەرەکان لە هەرێمی کوردستان بە "زەنگی مەترسیدار بۆ کۆمەڵگەکەمان" دانا.