دەستەیەکی بازرگانی لەنێوان هەرێمی کوردستان و تورکیا پێکدەهێنرێت

ئاڤا نیوز

سەردانەکەی ئەمجارەی ئەردۆغان زیاتر بە "سەردانێکی بازرگانی" ناودەبرێت و ئاڤا زانیویەتی پرسی کردنەوەی دەروازەیەکی نوێی سنووریی نێوان هەڕێمی کوردستان-تورکیا باس دەکرێت و دەستەیەکی هاوبەشی بازرگانی لەنێوان هەردوولا پێکدەهێنرێت.

لێدوانی فەرمی: محەمەد کایە، سەرۆکی ژووری بازرگانی دیاربەکر بە ئاڤا میدیای ڕاگەیاند: سەردانەکەی ڕەجەب تەیب ئەردۆغان، سەرۆککۆماری تورکیا، بۆ پەرەپێدانی پەیوەندییە بازرگانی و ئابوورییەکانە، چاوەڕێدەکرێت دەستەیەکی هاوبەشی بازرگانی نێوان تورکیا-هەرێمی کوردستان پێکبهێنرێت.

بابەتە ستراتیژییەکان: مافە یاساییەکانی بازرگانانی تورکیا لە هەرێمی کوردستان، کەمکردنەوەی باجی بەرهەمە بازرگانییەکانی دەروازەی ئیبراهیم خەلیل، ڕێکارەکانی ئاسانکاری ڤیزای تورکیا بۆ خەڵکی کورستان، لە ئەجێندای کۆبوونەوەکان دەبێت.

 

ئەوەی پێویستە بیزانیت: ماوەیەکی زۆرە تورکیا دەیەوێت دەروازەیەکی نوێی بازرگانی لە نێوان هەرێمی کوردستان- تورکیا بکرێتەوە، بەڵام بەهۆی ڕێگرییەکانی حکومەتی ناوەندی بەغدا نەچووەتە بواری جێبەجێکردنەوە.

 

ئەوەی پێشبینی دەکرێت: گەیلان حاجی سەعید، بەرپرسی ژووری بازرگانی هەولێر بە ئاڤا میدیای ڕاگەیاند: پێشبینی دەکەم بابەتی کردنەوەی دەروازە نوێیەکەی نێوان هەرێمی کوردستان-تورکیا، کەمکردنەوەی ڕسووماتی ڤیزای تورکیا بۆ خەڵکی کوردستان کە ماوەیەکی زۆرە داوامان کردووە، باس بکرێت."