وردەکاریی پڕۆژەی ڕێگەی گەشەپێدان

ئاڤا نیوز

 

"هاوکاریکردن لە پڕۆژەی ڕێگەی گەشەپێدان"، یەکێک بوو لەو ڕێککەوتنە گرنگانەی نێوان محەممەد شیاع سوودانی ـ سەرۆکوەزیرانی عێراق و ڕەجەب تەیب ئەردۆغانی سەرۆککۆماری تورکیا و هەردوو وڵاتی قەتەر و ئیمارات کە دوێنێ دووشەممە لە بەغدا واژۆیان لەسەر پەرەپێدانی کرد.

 

بۆچی گرنگە: پڕۆژەی ڕێگەی گەشەپێدان، هاوکار دەبێت لە گەشەی ئابووری و پتەوکردنی پەیوەندییە هەرێمی و نێودەوڵەتییەکان بۆ بەدیهێنان و یەکخستنی ئابووری دەکات و هۆکارێکیشە بۆ بەستنەوەی ئابووری ناوچەکە بە کیشوەری ئەوروپا.

 

لێدوانی فەرمیی:باسم عەوادی ـ گوتەبێژی حکومەتی عێراق لە کۆنگرەیەکی ڕۆژنامەوانی گوتی "هەرێمی کوردستان ڕۆڵی کاریگەری لە ڕێککەوتنی نێوان عێراق و تورکیا دەبێت و پڕۆژەی ڕێگەی گەشەپێدانی ئابووری، هەرێمی کوردستانیش دەگرێتەوە".

 

ئەوەی پێویستە بیزانیت: تێچووی پڕۆژەکە 17 ملیار دۆلارە. ڕێگەکە لە بەندەری فاوی باشووری عێراق دەست پێ دەکات و بە شارەکانی دیوانییە، نەجەف، کەربەلا، بەغدا و موسڵدا تێدەپەڕێت، پاشان لە باشووری ڕۆژهەڵاتی پارێزگای شڕناخەوە دەچێتە نێو خاکی تورکیا و لە بەندەری مێرسینی سەر دەریای ناوەڕاستەوە دەگاتە ئەوروپا.