لە عێراق پێنج ملیۆن نەمام بۆ بەرەنگاربوونەوەی زریانی خۆڵ دەچێنرێت

 ئاڤا نیوز 

حکومەتی عێراق، بە هەماهەنگی ژمارەیەک وەزارەت، هەڵمەتی چاندنی پێنج ملیۆن نەمام بۆ بەرەنگاربوونەوەی زریانی خۆڵ دەستپێدەکات، کە ساڵانە زیانێکی گەورەی مرۆیی و ماددی لێدەکەوێتەوە.

 

لێدوانی فەرمی: عەون زیاب، وەزیری سەرچاوە ئاوییەکانی عێراق ڕایگەیاند: وەزارەتی کشتوکاڵ و شارەوانیی گرنگترین ئەو وەزارەتانەن کە لەو هەڵمەتەدا بەشدارن، ئامانجیش لێی چاندنی سێ ملیۆن دار خورما و دوو ملیۆن داری زەیتوون و هەنارە، ئەو دارانە لە وەرزی هاویندا بەرگەی کەشوهەوای نالەبار دەگرن.

 

زانیاریی زیاتر: وەک وەزیری سەرچاوە ئاوییەکانی عێراق ئاماژەی پێداوە "وەبەرهێنەران ڕۆڵیان پێدراوە لەو هەڵمەتەدا بە چاندنی دار لە ناوچە بیابانییەکانی نەجەف و کەربەلا، جگە لە دروستکردنی پشتێنەیەکی سەوز لە دەوروبەری شارەکان بۆ بەرپەرچدانەوەی زریانی خۆڵ".

 

وێنە گەورەکە: عێراق چەند ساڵێكە بەهۆی وشكەساڵی ڕووبەڕووی بە بیابانبوون بووەتەوە، حكومەت لە هەوڵدایە بە چاندنی نەمام و دار كاریگەرییەكانی كەم بكاتەوە.