حەلبووسی هەڕەشەی کشانەوە لە پەرلەمان و حکومەت دەکات

ئاڤا نیوز 

پارتی تەقەدووم، بە سەرۆکایەتی محەممەد حەلبووسی هەڕەشەی کشانەوەی تەواوەتی لە پەرلەمان و حکومەت دەکات ئەگەر سەرۆکایەتی پەرلەمان بدرێتە پارتێکی دیکە.

لێدوانی فەرمی: ئەنوەر عەتوانی، سەرکردە لە پارتی تەقەدووم ڕایگەیاند: سەرۆکایەتی پەرلەمان پشکی پێکهاتەی سوننەیە و پارتی تەقەدووم زۆرینەی سوننە (43 کورسی) پێکدێنێت بۆیە دەبێت سەرۆکی پەرلەمان لە پارتی تەقەدووم بێت.

وێنە گەورەكە: نزیکەی شەش مانگە محەممەد حەلبووسی بە بڕیاری دادگەی باڵای فیدراڵی عێراق، بەهۆی سکاڵایەکی پەرلەمانتارێک لە سەرۆکایەتیی پەرلەمان دوورخراوەتەوە.

ئەوەی پێشبینی دەکرێت: هەفتەی داهاتوو دانیشتنی پەرلەمان لەبارەی هەڵبژاردنی شوێنگرەوەی حەلبووسی بەڕێوەدەچێت، زۆرینەی لایەنەکانی هاوپەیمانی چوارچێوەی هەماهەنگی پشتگیری لە "سالم عیساوی" دەکەن.

گۆشەیەكی دیكە: هەرچەندە نزیکەی سێ مانگ بەسەر  کۆتا دانیشتن تێپەڕیوە، هێشتا سوننەکان لەسەر یەکلایکردنەوەی بەربژێرێک بۆ سەرۆکایەتیی پەرلەمان ڕێکنەکەوتوون.