هەڵوێستی لایەنە سیاسییەکان لەبارەی دواخستنی هەڵبژاردن

ئاڤا نیوز

 

کاتی دیاریکراوی هەڵبژاردنی خولی شەشەمی پەرلەمانی کوردستان بە ئاراستەی دواخستنە، هەندێک لایەن پشتگیریی دواخستنی دەکەن و هەندێکیش دەڵێن "دژین". کۆمیسیۆنیش ئامادەکارییەکانی ڕاگرتووە.

 

وێنە گەورەکە: بە بڕیاری سەرۆکایەتیی هەرێمی کوردستان، دەبوو لە ڕۆژی 10ـی حوزەیرانی ئەمساڵ هەڵبژاردنی پەرلەمانی کوردستان بکرێت، دادگەی باڵای فیدراڵیی عێراقیش چەند بڕیارێکی لەبارەی شێوازی بەڕێوەچوونی هەڵبژاردنەکە دەرکرد، لەوانە نەهێشتنی کورسیی پێکهاتەکان و دابەشکردنی هەرێمی کوردستان بۆ چوار بازنەی دەنگدان.

 

کاردانەوەکان: پارتی دیموکراتی کوردستان وەک هێزی سەرەکیی کوردستان و دواتریش پێکهاتەکان، دوای بڕیارەکانی دادگەی باڵای فیدراڵیی بڕیاریان دا بەشداریی هەڵبژاردنەکە نەکەن. پارتی دەڵێت "ئەو بڕیارانە نەخشەسازیی پێشوەختەی هەڵبژاردنە".

 

چی ڕوودەدات؟ چەند ڕۆژێکە کۆمیسیۆنی باڵای سەربەخۆی هەڵبژاردنەکانی عێراق ڕێکارەکانی ئامادەسازیی بۆ سەرپەرشتیکردنی هەڵبژاردنەکە سست کردووە، هەموو ئاماژەکان بەو ئاراستەیەن پڕۆسەکە بۆ مانگی 10 دوابخرێت.