ئەمریکا هەناردەی غازی شل ڕادەگرێت

ئاڤا دیجیتاڵ

 

ئیدارەی بایدن بڕیاریدا، پرۆسەی پەسەندکردنی هەناردەکردنی غازی سرووشتی بۆ ماوەیەکی کاتی ڕابگرێت. ئەمەش دوای گوشارەکانی دەستەی ژینگەی کەشناسیی ئەمریکا بەهۆی لێکەوتەکانی هەناردەکردنی غاز لە ئەمریکا.

 

چیرۆکە سەرەکییەکە: ئەمریکا بڕیاریدا پرۆسەی پەسەندکردنی هەناردەکردنی غازی سرووشتی بۆ ماوەیەکی کاتی ڕابگرێت و ئیدارەی بایدن ئاماژەی بەوە کردووە: "ئەم بڕیارە بە هیچ شێوەیەک  کاریگەری لەسەر دابینکردنی  غازی پێویست بۆ وڵاتە هاوپەیمانەکانی ئەمریکا نابێت، بە تایبەت وڵاتانی  ئەوروپا، ئاسیا و کڕیارە ڕێگەپێدراوەکانی دیکە".

 

لێدوانی فەرمی:  بریارەکانی تایبەت بە وردەکاریی پرۆژە نوێیەکانی بەرهەمهێنانی غازی سرووشتی بۆ ئەم ساڵ ڕادەگیرێت، ئەمەش وەک کاردانەوەیەک بۆ فشارەکانی چالاکوانانی ژینگە و کەشوهەوا لە ئەمریکا". ئیدارەی بایدن،  سەرۆکی ئەمریکا ئەمەی ڕاگەیاندووە.

 

لەلایەکی دیکە: چالاکوانانی بواری ژینگە و کەشوهەوا پێشوازییان لە بڕیاری ڕاگرتنی ئەو پڕۆژانە کرد کە غازی شلی ئەمریکی هەناردە دەکرد و ئەو کارەی بایدنیان بە هەنگاوێکی بوێرانە وەسف کرد.

 

کاریگەری و لێکەوتەکان: ئەو بڕیارەی کە بایدن داویەتی سەبارەت بە ڕاگرتنی هەناردەکردنی غازی شل لە ئەمریکا، هێشتا کاردانەوەکانی ڕوون نەبووەتەوە، بەڵام بەرپرسانی ئیدارەی بایدن بەڵێنیان دا، لەژێر پەردەی ئاسایشی نیشتمانی ئەم بڕیارە هیچ زیانێک بە هاوپەیمانەکانیان نەگەیێنێت.