داوا دەکرێت کۆنسوڵی کوێت لە بەسرە دەربکرێت

ئاڤا نیوز

 

پەرلەمانتارێکی عێراق ڕایدەگەیێنێت، کوێت چەندین پێشێلکاری لەسەر خاک و ئاوی عێراق کردووە، بۆیە داوا دەکەن کۆنسوڵی ئەو وڵاتە لە بەسرە دەربکرێت.

 

لێدوانی فەرمی: عەلا حەیدەری، ئەندامی ئەنجوومەنی نوێنەرانی عێراق ڕایگەیاندووە، پێشێلکاری و سەرپێچییەکانی کوێت لەسەر خاک و ئاوی عێراق دووبارە دەبنەوە، ئەمەش دەرخەری ئەوەیە کە ئەو وڵاتە نایەوێت پەیوەندییەکی دراوسێیەتیی باشی لەگەڵ عێراق هەبێت.

 

هۆکارە زانراوەکان: لەماوەی ڕابردوودا کوێت بیرێکی نەوتی بەدووری چەند مەترێک لە شاری ئوم قەسرە هەڵکەندووە، پەرلەمانتارەکە ئەمە بە هەنگاوێكی بێزارکەر بۆ عێراقییەکان و خەڵکی بەسرە دادەنێت.

 

زانیاریی زیاتر: حەیدەری داوا لە سەرۆکایەتیی ئەنجوومەنی نوێنەران دەکات، لیژنەیەک بۆ بەدواداچوون بۆ ئەو پێشێلکارییانە پێکبهێنرێت و کونسوڵی کوێت لە پارێزگای بەسرە دەربکرێت، تاوەکو کێشەکان چارەسەر دەکرێن و ئەو وڵاتە ڕێز لە سەروەریی عێراق و گەلەکەی دەگرێت.