ئاسایشی هەولێر بۆ ئاڤا: چەند گومانلێکراوێکی سووتانی بازاڕی قەیسەریی هەولێر دەستگیرکران

ئاڤا نیوز 

 

ئاسایشی هەولێر سێ گومانلێکراوی بەتۆمەتی سووتاندنی بازاڕی قەیسەریی هەولێر دەستگیرکرد، لێکۆڵینەوەکانیش بەردەوامن. 

چیرۆكی سەرەكی: کاتژمێر 09:00ـی شەوی ڕابردوو ئاگر لە بازاڕی قەیسەری هەولێر کەوتەوە و دوای سێ کاتژمێر کۆنترۆڵکراو، بەو هۆیەوە 370 دووکان سووتان و شەش کەسیش برینداربوون.

زانیاريی بەدەستهاتوو: هەر دوای کۆنترۆڵکردنی ئاگرەکە، لێکۆڵینەوە ئەمنییەکان دەستیپێکرد و لەلایەن هێزەکانی ئاسایشەوە سێ کەس بە گومانی سووتاندنی بازاڕەکە دەستگیرکراون و لێکۆڵینەوە و بەدواداچوونەکانیش بەردەوامن.

لە لایەکی دیکەوە: نەبەز عەبدولحەمید، قایمقامی قەزای ناوەندی هەولێر بە ئاڤا نیوزی گوت: دوو لیژنە بۆ دەستنیشانکردنی زیانەکان و لێکۆڵینەوە لە هۆکارەکەی پێکهێنراون و ڕاپۆرتێک لەمبارەیەوە ئامادە دەکرێت.

ئەوەی پێویستە بیزانیت: ڕۆژی 08-04-2024، ئاگر لە بازاڕی لەنگەی هەولێر کەوتەوە و نزیکەی 50 دووکان سووتان، دواتریش سێ کەس بەتۆمەتی سووتاندنی بازاڕەکە دەستگیر کراون، کە دووکانداری بازاڕەکەبوون.