عێراق بۆ نەتەوە یەکگرتووەکان: پێویستمان بە ئەرکى يۆنامى نەماوە

ئاڤا نیوز 

 

سەرۆکوەزیرانی عێراق لە نامەیەکدا کە ئاراستەی سکرتێری گشتی نەتەوە یەکگرتووەکانی کردووە، داوای کۆتاییهێنان بە ئەرکی نوێنەرایەتی نەتەوە یەکگرتووەکان "یۆنامی" لە عێراق دەکات.

 

بۆچی گرنگە؟ پێشتر یۆنامی ڕایگەیاندبوو کە ئامادەکاری بۆ کۆتاییهێنان بە کارەکانی لە عێراق دەکات و هۆشداریشی دابوو لە دابەزینی متمانەی کورد و سوننە بە دامەزراوەکانی دەوڵەت.

 

هۆکارە زانراوەکان: بەپێی نووسراوێک کە وێنەیەکی دەست ئاڤا نیوز کەوتووە: محەممەد شیاع سوودانی، سەرۆکوەزیرانی عێراق نامەیەکى بۆ کۆتاییهێنان بە ئەرکى یۆنامى ئاراستەى سکرتێرى گشتیی نەتەوە یەکگرتووەکان کردووە و تێیدا هاتووە: "پێویستمان بە ئەرکى يۆنامى نەماوە و داوا دەکەین لە 31ـی کانوونى یەکەمى 2025 کۆتایى بە ئەرکى یونامى بهێنرێت".

 

ئەوەی پێویستە بیزانیت: لە نامەکەدا، سوودانی ئاماژەی بە داواکارییەکەی عێراق کردووە لە ساڵی 2023 بۆ درێژکردنەوەی ئەرکی نەتەوە یەکگرتووەکان بۆ ماوەی ساڵێک کە لە مانگی ئایاری 2024 کۆتایی دێت هاوکات داوا دەکات "بیر لە کەمکردنەوەی ئەرکی نوێنەرایەتییەکە بکاتەوە".

 

ئەوەی لەوبارەیەوە دەگوترێت: ئەنتۆنیۆ گۆتێرێز، ئەمینداری گشتی نەتەوە یەکگرتووەکان لە کۆتایی مانگی سێ نامەیەکی ئاراستەی ئەنجوومەنی ئاسایشی نێودەوڵەتی کردبوو، ئاماژەی بەوە دابوو "لایەنە کوردی و سوننییەکان هێشتا متمانەیەکی کەمیان بە دامەزراوەکانی دەوڵەت هەیە و بەدوای گەرەنتیەکی دەرەکیدا دەگەڕێن بۆ مافەکانیان و چاویان لە نوێنەرایەتیی نەتەوە یەکگرتووەکانە وەک لایەنێکی گەرەنتیکار".