تونێلی پیرمام بەڕووی بارهەڵگرەكاندا دەکرێتەوە

ئاڤا نیوز 

 

پارێزگای هەولێر ڕایگەیاند "بڕیاردرا بە كردنەوەی تونێلی پیرمام بەڕووی ئۆتۆمبێلە بارهەڵگرەكاندا".

ڕاگەیێنراوی فەرمی: پارێزگای هەولێر ڕایگەیاند: ئاگاداری شوفێران و هاووڵاتیان دەکەینەوە، لە پێناو بەرژەوەندىی گشتی و کەمکردنەوەی ئاستەنگی هاتووچۆ و جموجۆڵی بازرگانی، بڕیاردرا بە کردنەوەی "تونێلی پیرمام" بە ڕووی هاتووچۆی بارهەڵگرەکان بە پابەندبوونیان بە کێشی ڕێگا پێدراو و بارنەکردنی کێشی زیادە، ئەو بڕیارە تا ئەوکاتەیە کە ڕێگای گونجاویان بۆ دابین دەکرێت.

زانیاریی زیاتر: لە ڕۆژانی هەینی بۆماوەی (24) کاتژمێر ناتوانن بە تونێڵی پیرمام هاتووچۆ بکەن و لە بۆنە و پشووەکانیشدا ڕێگە پێدراونین.

 

ئەوەی پێویستە بیزانیت: پێشتر هاتووچۆی هەولێر ڕایگەیاندبوو: لەبەر بەرژەوەندیی گشتی و لەپێناو پاراستنی سەلامەتی شۆفێران بڕیار درا هاتووچۆكردنی ئۆتۆمبێلی بارهەڵگر بەنێو تونێلی پیرمام بە شێوەی یەكجاری قەدەغە بكرێت.

هۆكارە زانراوەكان: هاتووچۆی هەولێر هۆكارەكەی بۆ ئەوە گەڕاندبووەوە، گوایە ژمارەیەكی زۆر ئۆتۆمبێلی بارهەڵگر بەو تونێلەدا هاتووچۆیان دەكرد، ئەمەش وای كردبوو هاتووچۆ لە تونێلكەدا سست بێت و ئاستەنگ بۆ هاتووچۆی ئۆتۆمبێلەكانی دیكە دروست ببێت.