نزیکەی 400 هەزار مووچەخۆر لە هەژماری من تۆمار کراون

ئاڤا نیوز

 

سەرۆکوەزیران بارزانی ڕایدەگەیێنێت، نزیکەی 400 هەزار مووچەخۆر لە هەرێمی کوردستان لە هەژماری مندا تۆمار کراون و ئەوەی حکومەت دەستی پێکردووە، پێدانی هێزی ئابوورییە بە هاووڵاتییان.

 

لێدوانی فەرمی: سەرۆکوەزیران بارزانی لە کۆنگرەیەکی ڕۆژنامەوانیدا گوتی: "بە هیچ شێوەیەک گرفت لە پرۆسەی بە دیجیتاڵکردنی مووچەی فەرمانبەراندا نییە، ئێمە ماوەیەکی زۆرە ئەم پرۆسەیەمان دەستپێکردووە و تاوەکو ئێستا نزیکەی 400 هەزار کەس لە هەرێمی کوردستان تۆمارکراون'.

 

بابەتی ستراتیژی: سەرۆکوەزیران بارزانی ئاماژەوەی بەوەش کردووە، ئەوەی حکومەتی هەرێمی کوردستان دەستی پێکردووە، دروستکردنی توانای ئابوورییە بۆ هاووڵاتییان، هەر کەسێک دژی ئەو پرۆسەیە هەر شتێک بڵێت، دژی ئەوەیە هاووڵاتی خاوەنی  ئابووری خۆی بێت. 

 

ئەمەش بزانە: پرۆسەی خۆتۆمارکردن لە پرۆژەی هەژماری من لەلایەن مووچەخۆرانی هەرێمی کوردستان بەخێرایی بەڕێوەدەچێت و خەڵک بە شێوازێکی بەرفراوان پێشوازی لێ دەکات.

 

بۆچی گرنگە؟ لە پڕۆژەی هەژماری مندا مووچەخۆران جگە لە وەرگرتنی مووچە، لە 19 خزمەتگوزاریی بانکی و چەندین جۆری قەرز و پێشینە سوودمەند دەبن، پڕۆژەکەش ڕێگری لە سپیکردنەوەی پارە دەکات و گەندەڵیش کەم دەکاتەوە.