تاوەکو ئێستا دۆسیەی نزیکەی 40 هەزار فەرمانبەر لە سلێمانی بۆ پێدانی زەوی یەکلاکراوەتەوە

‎ئاڤا نیوز

 
‎لە سنووری 45 شارەوانی لە پارێزگای سلێمانی، دۆسیەی نزیکەی 40 هەزار فەرمانبەر بۆ پێدانی زەوی نیشتەجێبوون یەکلایی کراوەتەوە، بەڵام زەوی لە سنووری بەشێکی شارەوانییەکان ئامادە نییە. 

 

‎وێنە گەورەکە: لە سنووری پارێزگای سلێمانی، 37 هەزار و 394 فەرمانبەری هەمیشەیی و گرێبەست مەرجەکانی وەرگرتنی زەوی دەیانگرێتەوە و زانیارییەکانیان بە مەبەستی ئاراستەکردنی بۆ ئەنجوومەنی وەزیران تۆمار کراون.

 

‎زانیاریی زیاتر: لە کۆی ئەو 45 شارەوانییەی پارێزگای سلێمانی، تەنیا لە سنووری 15 شارەوانی زەوی بۆ دابەشکردن ئامادەیە، کە ژمارەیان 2329 پارچە زەوییە، لە بەرامبەردا هێشتا لە سنووری 28 شارەوانی دیکە زەوی بۆ دابەشکردن ئامادە نییە. 

 

‎لێدوانی فەرمی: ئاوات عەزیز، بەڕێوەبەری ڕاگەیاندنی بەڕێوەبەرایەتیی گشتیی شارەوانییەکانی سلێمانی بە ئاڤا نیوزی گوت: ژمارەی فەرمانبەرانی شایستە زیاد دەکرێت، چونکە هەوڵەکانمان بۆ تۆمارکردنی زانیاریی فەرمانبەران بەردەوامیان هەیە و هێشتا نەگەیشتووینەتە کۆتایی پرۆسەکە”. 

 

لەلایەکی دیکەوە: بەڕێوەبەرایەتیی ڕاگەیاندنی شارەوانییەکانی سلێمانی ئاماژەی بەوە داوە کە سەرجەم شارەوانییەکان بەردەوامن لە ناردنی زانیاری لەسەر ژمارەی ئەو زەویانەی کە ئیفراز کراون و ئامادەن بۆ دابەشکردن.